Денис Теннің өліміне күдікті ретінде танылған Нұралы Қиясовтың оқыған колледж Меркі ауданы, Сарымолдаев ауылында орналасқан. Ол №9 кәсіптік лицейіне 2009 жылы «Фермер шаруашылығы: тракторист — машинист» мамандығы бойынша түсіп, 2012 жылы аяқтаған. Сабағының бәрі 4, тек біреуін ғана 3-ке тәмамдапты. Негізі күдікті Меркі ауданы Қазақдихан ауылының тумасы, Жамбыл ауылында нағашы әпкесінің үйінде тіркеуде тұрған. Әкесінің шаруа қожалығы бар екен. Сондықтан да баласын «тракторист — машинист» мамандығына түсірген көрінеді. Колледжден күдіктінің кураторына телефонмен хабарласып төмендігдей хабар ала алдық:
— Ол шаруа отбасында дүниеге келген. Нұралы бізде оқыған кезде мұндай бұзақылық әрекеттерімен көзге түспеген болатын. Сабақтан себепсіз қалмайтын. Ол фермер тобында оқыды. Бұдан басқа ештеңе айта алмаймын. 2012 жылы бітіріп кеткен бала. Ол кезде Нұралы қатты бұзық болып көрінген жоқ- дейді оған куратор болған Гүлмира Бөрібаева.
Тағы бір айта кететін жайт, оның Алматыға кетуіне ата-анасының ажырасуы себеп болған. Бірақ ата-анасы кейіннен қайта қосылған.
