Жасанды интеллект технологияларының көмегімен түсірілген фильмдердің халықаралық фестиваліне дайындық барысы «Astana AI Film Festival» қоры Қамқоршылық кеңесінің отырысында талқыланды.
Мемлекет басшысы Қасым-Жомарт Тоқаев 2026 жылды Цифрландыру және жасанды интеллект жылы деп жариялады. Astana AI Film Festival фестивалін өткізу Қазақстанның жасанды интеллект саласындағы жаһандық күн тәртібін қалыптастыруға белсенді қатысушы ретіндегі мәртебесін нығайта түседі.
AAIFF Қамқоршылық кеңесінің отырысына Қамқоршылық кеңес мүшелері Қуанышбек Есекеев пен Раушан Қажыбаева, Премьер-министрдің орынбасары – Жасанды интеллект және цифрлық даму министрі Жаслан Мәдиев, UNI-Q Group медиахолдингінің төрағасы Мұхамедқали Тауан, сондай-ақ фестивальді ұйымдастырушылар Алмас Жәлі мен Айзатулла Хуссейн қатысты.
Отырыс барысында байқау бағдарламасы, Astana Digital Bridge аясында фестивальді ұйымдастыру және қатысушылар мен қонақтарды қабылдауға дайындық мәселелері қаралды.
Ұйымдастырушылардың мәліметінше, ең көп өтінім АҚШ-тан түскен – 17 пайыз. Үндістаннан – 10 пайыз, Қазақстаннан – 8 пайыз өтінім жолданған. Одан кейінгі орында Оңтүстік Корея мен Қытай – 5 пайыздан, Ұлыбритания – 4 пайыз, Ресей мен Гонконг – 3 пайыздан.
Фестивальдің халықаралық қазылар алқасының құрамына ЮНЕСКО-ның бұрынғы бас директоры Одрэ Азуле, China Film Group өкілі Ма Пин және Бейжің киноакадемиясының өкілі Ван Хао енді. Astana AI Film Festival фестивалінің бас серіктесі – Freedom Holding Corp.
Отырыста атап өтілгендей, Бейжің қаласында өткен ЖИ-кино саласындағы Қазақстан-Қытай инновациялық алмасу форумының қорытындысы бойынша Astana AI Film Festival қоры мен Beijing Zhongguancun Tongli Technology Service Co., Ltd. арасында ынтымақтастық туралы меморандумға қол қойылды. Қытайлық компания фестивальдің Қытай Халық Республикасындағы ресми өкілі атанды.
Ұйымдастырушылардың айтуынша, өтінімдер географиясының кеңдігі кәсіби қауымдастықтың кинематографиядағы жаңа бағытқа деген қызығушылығының артып келе жатқанын көрсетеді. Жасанды интеллект фильм түсіру тәсілдерін ғана емес, тұтас кино өндірісінің моделін де өзгертуде.
Astana AI Film Festival 2026 жылғы 1–3 қазан аралығында Астана қаласында Astana AI Week аясында өтеді. Бағдарламада жүлде қоры 1 миллион АҚШ долларын құрайтын ЖИ-фильмдердің халықаралық байқауы, конференция, жобалар питчингі, ашық кино көрсетілімдері, сондай-ақ жасанды интеллект, кино және цифрлық шығармашылық саласындағы жетекші әлемдік сарапшылармен кездесулер қарастырылған.
Негізгі киноконкурстың тақырыбы – «The future worth living in» («Өмір сүруге лайық болашақ»). Сонымен қатар бес номинациядан тұратын ашық секция ұйымдастырылады. Өтінім қабылдау 2026 жылғы тамыз айының соңына дейін жалғасады.
Фестивальдің ресми бағдарламасына енген фильмдер алғаш рет Астанадағы Chaplin кинотеатрында үлкен экраннан көрсетіледі. Іскерлік бағдарлама Digital Bridge форумы аясында өтіп, халықаралық спикерлердің қатысуымен пленарлық және панельдік сессияларды, воркшоптар мен шеберлік сабақтарын қамтиды.
