Бұл туралы Шымкент қаласында Еуразиялық үкіметаралық кеңестің кеңейтілген құрамдағы отырысы аясында өтіп жатқан Digital Qazaqstan 2026 форумында ҚР Үкіметінің басшысы Олжас Бектенов айтты, деп хабарлайды Үкіметтің баспасөз қызметі.
Форумның пленарлық отырысын ашқан Қазақстан Республикасының Премьер-министрі Олжас Бектенов жасанды интеллектіні дамытудың негізгі бағыттарын айқындады. Атап айтқанда, институционалдық негіз қалыптастыру, цифрлық инфрақұрылым және адами капитал сынды мәселелерге басымдық берілді.
Қазақстан электрондық үкіметті дамыту индексінде бүгінде 193 елдің ішінде 24-орында тұр. Сонымен қатар, еліміз онлайн қызметтердің сапасы бойынша әлемдегі көшбасшы мемлекеттердің алғашқы ондығына кіреді. Мемлекет басшысы Үкіметке алдағы үш жыл ішінде Қазақстанды толыққанды цифрлық елге айналдыру жөнінде ауқымды міндет жүктеді.
Премьер-министрдің айтуынша, халықаралық сарапшылардың бағалауына сәйкес, 2030 жылға қарай жасанды интеллектінің әлемдік экономикаға қосатын үлесі — 22 трлн доллардан асады. Бұл Еуразиялық экономикалық одақ елдері үшін сапалы экономикалық серпін жасауға бірегей мүмкіндік.
Фото primeminister.kz
«Бүгінде Қазақстан цифрландыру мен жасанды интеллект жаңа экономикалық модельдің негізіне айналатын кезеңге қадам басты. Сондықтан Қазақстан Президенті Қасым-Жомарт Кемелұлы Тоқаев 2026 жылды Цифрландыру және жасанды интеллект жылы деп жариялап, бұл саланың еліміз үшін айрықша маңыздылығын атап өтті.
Өздеріңіз білетіндей, биыл Қазақстанда ауқымды саяси оқиғалар мен жаңарулар болып жатыр. Еліміздің азаматтары жаңа Конституцияны қабылдады және онда алғаш рет конституциялық деңгейде цифрлық құқықтар бекітілді. Бұл саланың одан әрі дамуына елеулі серпін беріп қана қоймай, мемлекеттің стратегиялық басымдықтарын да көрсетеді.
Цифрлық құқықтарды ең жоғары деңгейде бекіту біз үшін цифрлық трансформация тек технологияларды дамыту туралы ғана емес, сонымен қатар нақты құқықтық кепілдіктер, деректерді қорғау және сенім принциптері туралы екенін айқындайды.
Осылайша, Қазақстан цифрлық технологиялар мен жасанды интеллектіні дамыту үшін болжамды әрі тұрақты құқықтық орта қалыптастыруда», — деп атап өтті Олжас Бектенов.
Форумға ЕАЭО елдерінің үкіметтері басшылары, IT-индустрия өкілдері, халықаралық компаниялардың өкілдері, инвесторлар мен сарапшыларды қоса алғанда, 3 мыңнан астам делегат қатысуда.
