Тараз қаласы № 2 сотында судья А.Ш.Қорабаеваның төрағалық етуімен ҚР ҚК-нің 191-бабының 2-бөлігінің 1-тармағымен /тонау/ айыпталып сотқа берілген К-ға қатысты қылмыстық ісі қаралды.
Сотталушы К. 2017 жылы 22 наурызда сағат 20.00 шамасында Тараз қаласы, Төле би көшесі бойында орналасқан «Орталық саябақ» аумағында өзіне бұрын соңды таныс емес жәбірленушілер С. және Ә-мен өзара сөйлесу барысында олардың қандай маркалы ұялы телефондары барын білгеннен кейін, соңғылардан оған қаражат қажет болып тұрғандығын айтып, ұялы телефондарын бере тұруларын сұраған және олардың ұялы телефондарын ломбардқа кепілге қойып, ақша алатынын, бір-екі күннен кейін кепілден шығарып қайтарып беретінін айтқан. Бірақ аталған жәбірленушілер сотталушының бұл бұйымтайына келіспей ұялы телефондарын беруден бас тартқан кезде, сотталушы оларға бәрібір күш қолданып, ұялы телефондарын тартып алатынын айтып қорқытып, жәбірленуші С-ның құны 75 000 теңге тұратын «LG K8» маркалы ұялы телефонын және жәбірленуші Ә-нің құны 65 000 теңге тұратын «Samsung Grand Neo» маркалы ұялы телефонын, оларға күш қолданамын деп қорқыту арқылы ашық түрде жымқырып, оқиға орнынан бой тасалаған.
Тараз қаласы № 2 сотының 20.06.2017 жылғы үкімімен қылмыстық теріс қылық жасағаны үшін К. ҚР ҚК-нің 191-бабының 2-бөлігінің 1-тармағымен кінәлі деп танылып, оған оның меншігіндегі қылмыстық жолмен табылған қаражатқа сатып алынған мүлкі тәркіленіп, 3 (үш) жыл 6 (алты) ай мерзімге бас бостандығын шектеу жазасы тағайындалған.
Тұрақты жұмыс орны жоқ және оқуда жоқ болған жағдайда бас бостандығын шектеуге сотталған К. жергілікті атқарушы органдар айқындайтын орындарда, бірақ жылына екі жүз қырық сағаттан аспайтын мәжбүрлі еңбекке тартылған.
Сотталған К-тың бас бостандығын шектеу жазасының бақылауы Жамбыл облысы бойынша ҚАЖД-нің Тараз қалалық пробация қызметіне жүктелген.
Үкім заңды күшіне 10.07.2017 жылы енген.
TURANINFO.KZ
