ІІМ брифингінде ведомствоның ресми өкілі Шыңғыс Алекешев елдегі есірткі ахуалы және есірткі қылмысына қарсы іс-қимыл туралы айтты.
– Биыл 2063 қылмыстық есірткі құқық бұзушылығы анықталды. Есірткі өткізудің 517 фактісі тоқтатылды. Әрбір үшінші факт интернет арқылы жасалады. Сондай-ақ есірткіні аса ірі мөлшерде сақтаудың 149 фактісі анықталды, – деді спикер.
Жыл басынан бері төрт ұйымдасқан қылмыстық топ жойылды. Оның ішінде бір трансұлттық қылмыстық топ бар. Ұйымдасқан қылмыстық топты ұйымдастырғаны және оған қатысқаны үшін сегіз қылмыстық іс қозғалды.
16 есірткі зертханасы анықталды. Оның сегізінде синтетикалық есірткі өндірілген. Есірткі өндірісіне қатысқан 15 адам ұсталды. Олардан 128 кг есірткі мен 390 литр прекурсор тәркіленді.
– Тәркіленген синтетикалық препараттардың көлемі артып келеді. Егер 2018 жылы бір жылда жалпы 5 кг жаңа психоактивті зат тәркіленсе, былтыр бір тоннадан астам психоактивті зат тәркіленді. Ал биыл үш айда 225 кг “синтетика” тәркіленді. Жалпы тоқсан ішінде бір жарым тоннаға жуық түрлі есірткі заңсыз айналымнан алынды, оның ішінде 946 кг марихуана, 237 кг гашиш, – деді Шыңғыс Алекешев.
Полиция интернет арқылы жасалатын есірткі дилерлігіне қарсы тұруға ерекше назар аударады. “Кибернадзор” ақпараттық жүйесінің көмегімен есірткі сайттары анықталып, оларды бұғаттау үшін мәліметтер Мәдениет және ақпарат министрлігіне жіберіледі. Үш айдың ішінде есірткінің таралуы туралы ақпараты бар мыңға жуық сайт анықталып, бұғатталды.
– Сондай-ақ, есірткі тарататын интернет-дүкендерді анықтау үшін Telegram-бот құрылды. Оған 2000-нан астам қызметкер қосылған. 52 ірі интернет-дүкен, сонымен қатар жалпы аудиториясы 75 мыңнан астам әлеуметтік желі қолданушыларынан тұратын 37 бот жойылды, – деп атап өтті Шыңғыс Алекешев.
ІІМ “OLX Group” өкілдігімен өзара іс-қимылды жолға қойды. Соның арқасында курьерлік жұмыстың атын жамылып, есірткі жасырушыларды жалдау бойынша жасалған 4300-ден астам хабарландыру өшірілді.
Есiрткi қылмысына қарсы іс-қимыл бағыты есiрткi, психотроптық заттар, сол тектестер мен прекурсорлардың айналымы саласында мемлекеттік саясатты іске асыруды, сондай-ақ реттеу, іске асыру және бақылау функцияларын жүзеге асырады.
Функциялары:
- есірткі, психотроптық заттар, сол тектестер мен прекурсорлардың айналымы, сондай-ақ олардың заңсыз айналымы мен оларды теріс пайдалануға қарсы іс-қимыл саласындағы мемлекеттік саясатты ұйымдастыру және іске асыру;
- мемлекеттік органдардың және өзге де ұйымдардың нашақорлық пен есiрткi бизнесінің алдын алу және оларға қарсы іс-қимыл жасау мәселелері бойынша қызметін ведомствоаралық үйлестіруді қамтамасыз ету;
- есірткі, психотроптық заттар, сол тектестер және прекурсорлармен байланысты қылмыстарды ескерту, анықтау, олардың жолын кесу және ашу;
- ақпараттық-коммуникациялық жүйеде есірткі қауіпсіздігін қаматамасыз ету;
- есірткі, психотроптық заттар, сол тектестер мен прекурсорлардың айналымына мемлекеттік бақылауды ұйымдастыру;
- есірткі ахуалының жай-күйі мен даму үрдісінің мониторингін жүзеге асыру;
- есірткі қылмысы мен есірткі құқық бұзушылықтарының алдын алу және есірткі қылмысына қарсы іс-қимыл нысандары мен әдістерін жетілдіру;
- есірткі қылмысына қарсы іс-қимыл жасасуда шет мемлекеттердің құқық қорғау органдарымен, халықаралық ұйымдармен өзара іс-қимыл жасасуды жүзеге асыру;
- Кинологиялық қызмет орталықтарының қызметін үйлестіру және ұйымдастыру.
