Жуалы ауданы Ақтөбе ауылдық округінің кәсіпкері Керімхан Мейірханұлы жүгері дақылының әр гектарынан 45-50 центнерден өнім алып, сүрлем бастыруда. Сондай -ақ «Андрей», «Абзал» шаруа
қожалықтары 20 гектар алқапқа егілген жүгеріні жинауды бастап кетті. Қожалық иелері одан құнарлы мал азығын дайындап, ауыл тұрғындарына сатуды жоспарлауда.
Бүгінде «Мұхиддин» шаруа қожалығы 25 гектарға себілген дала аруын орып, мал азығын бастырып жатыр. Жиырма жыл бұрын құрылған шаруа қожалығы егіншілікпен қатар, мал шаруашылығымен де айналысады. Керімхан Мейірханұлының айтуынша, қожалық жұмысын «Сыбаға» бағдарламасы аясында несиеге мал сатып алып бастаған. Ал екі жыл бұрын «Атамекен» ұлттық кәсіпкерлер палатасынан қомақты қаражат алып, Ресейден асыл тұқымды қараала сауынды сиырын алып келген. Қазіргі таңда 30 бас жергілікті, 40 бас асыл тұқымды сиыр сауып, күндігіне 400-450 литр сүт өндіруде. Сүтті Тараз қаласындағы «Көкжиек» сүт зауытына өткізеді.
Негізінен қожалық сүт бағытында жұмыс істейді. Шаруашылықтың бүгінде 120 гектар жайылымдық, 130 гектар егістік алқабы бар. Техникадан шаруаға жарап тұрған – екі «МТЗ-80» маркалы тракторы мен ауыл шаруашылығы тіркемелері. Биыл 20 гектарға арпа, 10 гектарға бидай, 25 гектарға жүгері себуіпті. Бұдан бөлек жоңышқалығы бар.
«Биыл егістік алқабына 750 килограмм жүгерінің дәнін септік. Екі алқаптың біріне «Машук-319», екіншісіне «Будан» сұрыпты жүгері тұқымын еккен болатынбыз. Алғашқысының дәнін алдық. Ал «Будан» сұрыпты жүгеріні орып, сүрлем әзірлеудеміз. Сүрлемнің шығыны аз. Ол сауынды сиырдың сүтін көбейтуге таптырмас құнарлы мал азығы. Сүрлем мен пішендемені жылда өз малымызға жететіндей етіп дайындаймыз. Қыс айларында бір сиыр 10-15 литрден сүт береді. Менің сүрлем әзірлеумен айналысқаныма бес жыл болды. Оның пайдасын жақсы білеміз. Жүгерінің әр гектарынан 45-50 центнерден өнім алудамыз. Түгелдей орып, арнайы әзірленген шұңқырға тастадық», — дейді қожалық төрағасы Керімхан Мейірханұлы.
Одан бөлек, кәсіпкер алдағы жоспарларымен де бөлісіп, жаңбырлатып суғару технологиясын орнатқалы жүргенін жеткізді. Алдағы уақытта егістік көлемін 40 гектарға дейін арттырмақ ниетте.
Өңірлік коммуникациялар қызметі
