Жамбыл облысы Полиция департаментінің Есірткі қылмысына қарсы іс-қимыл басқармасының қызметкерлері жедел алдын алу іс-шараларын жүргізу барысында Жуалы ауданының 46 жастағы тұрғынын ұстады. Ол салмағы 3 келі 600 грамм болатын «гашиш» есірткі затын көмбеде жасырын сақтаған – бұл туралы Жамбыл облысы Полиция департаментінің бастығы Арман Оразалиев фейсбук парақшасында жазды.
Күдікті өз кінәсін толық мойындап, Тараз қаласының уақытша ұстау изоляторына қамаққа алынды. Ұсталған азамат бұрын сотты болмаған.
Аталған дерек бойынша Қазақстан Республикасы Қылмыстық кодексінің 296-бабы 4-бөлігімен сотқа дейінгі тергеу амалдары басталды.
Полиция департаментімен өңірде есірткі құралдарының заңсыз айналымына қатысты қылмыстар мен құқық бұзушылықтарды анықтау бойынша профилактикалық жұмыстар ұдайы жүргізілуде.
