Талдықорғанда ер адамдардан ақша бопсалаумен айналысқан қылмыстық топ анықталды. Топ құрамында қыздар мен олардың сыбайластары болып, олар алдын ала ойластырылған сызбалар бойынша әрекет еткен
Тергеу мәліметінше, 2024 жылғы мамырда бірнеше қыз жалған айып тағу және абыройын түсіретін мәліметтерді таратамыз деп қорқыту арқылы қылмыстық жолмен ақша табуды көздеген.
«Құрбандарын іздеу үшін олар әлеуметтік желіні пайдаланып, ер адамдармен танысып, әңгімелесуді интим жақындыққа жеткізген. Содан кейін іске екінші қатысушы араласқан, ол жәбірленушіге «құрбысы жылап отыр» деген сылтаумен қоңырау шалып, келуін сұраған. Кездесуде зорлық туралы полицияға арызданамыз деп ер адамды қорқытып, одан ақша талап еткен. Алғашқы жәбірленуші күдіктілерге 350 мың теңге берген», — деді ІІМ өкілдері.
Күдіктілер екінші жәбірленушіден дәл осындай сызба бойынша «жүктілікке» байланысты 2 миллион теңге талап етіп, 900 мың теңгеден аса ақша алған.
«Кейін бұл іске ер адам қосылып, келесі жәбірленушіден 2 миллион теңге бопсалауға көмектескен, бірақ олар 800 мың теңге алған. Тағы бір жәбірленушіден 795 мың теңге алған», — дейді ІІМ өкілі.
Ең сорақы алаяқтықтардың бірі кәмелетке толмаған адамды зорлауға оқталу оқиғасы болған.
«Бұл эпизодқа төрт күдікті қатысқан: бір қыз жыныстық қатынасқа түсуі керек болған, ал үшеуі өздерін туыстарымыз деп таныстырып, ақша бопсалаған. Осылайша олар 800 мың теңге иемденген. Осындай схемалар қылмыскерлерге бірнеше мәрте ақша әкелген: 600 мың, 1,5 миллион, 1 миллион теңге», — деп жазылған хабарламада.
Бір жағдайда күдіктілер өздерін полиция қызметкерлеріміз деп таныстырып, күш қолданып, 500 мың теңге тартып алған.
«Жалпы саны 9 күдікті 11 адамнан ақша бопсалағаны анықталды. Олардың барлығы ұсталып, қамауға алынды», — деп жазылған хабарламада.
