Жастардың таңдауы – Жас Отан!
«Нұр Отан» партиясы Жамбыл облыстық филиалы жанындағы «Жас Отан» Жастар қанатының «Менің таңдауым — Жас Отан!» атты жастар форумы өтті.
Бүгінде облыстық «Жас Отан» жастар қанатының 145 бөлімшесінде 14 мыңнан аса мүшесі бар жастардың белсенді ұйымы. Олар өңірде қоғамның басты қозғаушы күші болып табылатын жастардың бойына қазақстандық патриотизмнің терең сезімін қалыптастыру бағытында ілкімді жұмыстар атқарып келеді. Жастар саясатының діңгегіне айналып отырған ұйымның бұл салада да жұмысы жүйелі, өресі биік. М.Х.Дулати атындағы ТарМУ-дің М.Үркімбаев атындағы Жастар сарайында өткен жасотандықтардың шарасына «Нұр Отан» партиясы Жамбыл облыстық филиалы төрағасының орынбасары Шәбден Тілеумұрат, сондай-ақ «Жас Отан» Жастар қанатының белсенділері, «Кеңес беру консалтинг орталығының» ұймдастырылмаған базар жастары, ҮЕҰ мен мемлекеттік мекемелердің жұмысшы жастары және жоғары оқу орындары мен орта арнаулы оқу орындарының студенттері қатысты. Жиында Шәбден Тілеумұрат сөз алып, жастар қанатының атқарып жатқан жұмыстарына тоқталып, қолға алып отырған жобаларының іске асуына сәттілік тіледі.
– Партия жұмысының алға басуына жасотандықтар белсенді атсалысып келеді. Олар өңірде жастар саясатының дамуына да үлес қосуда. Бүгінде жоғары және орта арнаулы оқу орындарынан өзге кәсіпорындарда бөлімшелер ашылып, нәтижелі жұмыс атқаруда. Жасотандықтар жастар саясатынан өзге өскелең ұрпақ бойына отаншылдық сезімі мен өз еліне деген сүйіспеншілігін дамыту бағытындағы істері ілкімді. Еліміздің келешегі, мәдениеті жастардың қолында. Қазір жастар қандай болса кейінгі ұрпақ та сондай. Бұл ретте жасотандықтарға артылып отырған сенім мол, – деді Шәбден Тоқтасынұлы. Мұнан соң ТарМУстуденті, ұйымның белсенді мүшесі Салтанат Букешова «Жас Отан» жастар қанаты студенттік өмірді қызықты әрі пайдалы өткізуді қамтамасыз ете алатын бірден бір орта екенін атап өтті.
Жас Отан – тек саяси ұйым ғана емес, студенттердің бойына бауырмалдылық, креативтілік және «бәріміз біріміз үшін» деген ұран нақты қалыптастыра алатын ұйым екендігін тілге тиек етті. Сонымен қатар «Нұр Отан» партиясы Жамбыл облыстық филиалы жанындағы «Жас Отан» Жастар қанатының төрағасы Уалихан Болатбек форумның мақсаты – «Жас Отан» Жастар қанатының ішкі активін қалыптастыру, дамыту және ілгерілету және өскелең ұрпақ бойында жаңа қазақстандық патриотизмнің терең сезімін қалыптастыру, отаншылдық сезімі мен өз еліне деген сүйіспеншілігін дамыту екендігін атап өтті. Облыстағы жасотандықтардың басшысы ұйымның жұмысына сүбелі үлесін қосқан белсенді жастарға «Жас Отан» жастар қанатының төрағасы Данияр Сүндетбаевтың Алғыс хатымен марапаттады. Сондай-ақ оларға ұйым куәлігін табыс етті. Шара «Жас Отан» жастар қанатының өнерлі мүшелерінің концерттік бағдарламасымен қорытындыланды.
Шынболат Сейдуалиев
