«Жастар авиациялық орталығы» нағыз патриоттар мекені
«Жастар авиациялық орталығы» қоғамның бірлестігі запастағы подполковник Анатолий Кисильдің идеясымен 2001 жылы 14057 әскери бөлімінің базасында ашылды. Қоғамдық бірлестік әскери-азаматтық авиацияның резервті дайындығы, облыстың спорттық авиациясының әлеуетін көтеру, жастарды қылмыс пен радикалды ағымдардан қорғау мақсатында жұмыс жасап келеді.
2004 жылдан бастап әскери бөлімнің жаңадан құрылуына байланысты қоғамдық бірлестік Тараз қаласындағы әуежайға орналасты. Осы жылы бірлестіктің қатарына ауған соғысының 6 ардагер офицерлері қосылды. «Әулие ата» әуежайында орналасқан орталық парашютпен секіру, парапландармен ұшу, әскери топография, физикалық, саптық, таудағы және авиациялық дайындық, ТЖ-да аман қалу негіздері, қол жекпе-жегі бойынша дайындықтар өткізеді. Әуежайдың жетекші мамандары аэродинамика, навигация бойынша дәрістер оқып, курсанттар ұшақ пен тікұшақ құрылысының негіздерін зерделеуде.
Орталық құрылған уақыттан бастап бұл жерден 1200 тәрбиеленуші түлеп ұшты. 85 тәрбиеленуші кадрлық офицер болып, отанға қызмет етіп жүр. Еліміздің барлық әскери бөлімдерінде осы орталықтың тәрбиеленушілері әскери анттарына адал болып, борыштарын өтеуде. Мұнымен қоса спецназдардың қатарында орталықтың түлектері баршылық. Азаматтық авиация саласында 6 нәзік жанды ару қызмет атқаруда.
«Жастар авиациялық орталығы» қоғамның бірлестігі жастарға патриоттық тұрғыдан тәрбие беретіндіктен, бұл жердің өз тәртібі, өзінің қабылдайтын анты, өз ерекшеліктері бар. Ұйым ауған соғысында ерлікпен қаза тапқан батырларымыздың ерліктерін ел есіне салуға арналған шаралар мен қатар халық қаһарманы Ғазиз Байтасовтың есімін ұлықтауға арналған рәсімдерге жыл сайын белсенді қатысып келеді.
Бірлестік мемлекеттік әлеуметтік тапсырыс шеңберінде жылына 15-20 патриоттық мазмұнда мектептерде, әскери бөлімдерде түрлі шаралар өткізеді. Әскери-техникалық білімді жетілдіру бағытында облыс аудандарында дәрістер өткізіп, жас жеткіншектерді отан қорғауға қанаттандырады. 16 жастан асқан жеткіншектерді парашют пен парапланнан секіруге, әскери тәртіпке, отан аспанын қорғауға дағдыландыратын қоғамдық бірлестікте ғұмырын отан алдындағы қасиетті борышын адал атқаратын азаматтар ғана шыдас беріп, қару күштердің қыр-сырына куә болады. Мұнда спецназдар да даярлықтан өтеді. Тіпті қыз балалар да белсенділік танытып, жігіттер орындайтын нормативтерді қиналмай орындап жатады.
Бойында қажырлы қайрат пен төзімділік, әскери өмірге деген үлкен махаббаты толастамаған, бар ғұмырын қатаң тәртіпке арнаған «Жастар авиациялық орталығы» қоғамның бірлестігінің басшысы Аннатолий Кисиль бар мүмкіндігі жеткенше болашақ әскери адамдарды, оның ішінде парашютистер мен парапланеристерді дайындау жолында еш аянбаймын дейді.
TURANINFO.KZ
