Жамбыл облыстық айтыскер ақындар, жыршы-термешілер орталығында өткен рухани басқосу «Әулиеата» клубының жұмысы аясында «Өнерге ғашық жүрек» тақырыбында ұйымдастырылды. Кездесу барысында қонақ орталық жанындағы «Ақберен» айтыс үйірмесі мен «Қаратау» жыр үйірмесінің шәкірттерімен еркін форматта сұхбат құрып, шығармашылық жолы, айтыс өнерінің қыр-сыры, ақындық мектеп пен өнердегі ізденістері жайында кеңінен әңгімелесті.
Кездесуді дәстүрлі әнші, халықаралық және республикалық байқаулардың лауреаты Бекарыс Көштаев тізгіндеді. Жиында жас талапкерлер өздерін толғандырған сауалдарын қойса, ақын өмірлік тәжірибесі мен шығармашылық ұстанымдары туралы құнды ойларымен бөлісті.
Іс-шара соңында Жамбыл облыстық айтыскер ақындар, жыршы-термешілер орталығының директоры Ахметжан Өзбеков пен айтыскер ақын, орталық қызметкері Ербол Қамбатыров ақжарма тілектерін білдіріп, жастарға ұлттық өнерге адал қызмет етудің маңызын атап өтті. Өз кезегінде кештің басты қонағы Алина Айдаралы мазмұнды кездесуді ұйымдастырған орталық ұжымына алғысын жеткізіп, жас талапкерлерге шығармашылық табыс тіледі.
Тағылымды кездесу ұлттық сөз өнерін дәріптеп, жастардың айтыс пен жыршылық дәстүріне қызығушылығын арттыруға, сондай-ақ мәдени мұраны насихаттауға бағытталған мазмұнды рухани алаңға айналды.
Жамбыл облысы әкімдігінің мәдениет және тілдерді дамыту
басқармасының баспасөз қызметі
