Қазақстан Республикасы Президентінің Жарлығымен Ғалым Құлекеев Қарағанды облыстық сотының төрағасы болып тағайындалды.
Жаңа төрағаны облыстың судьялар корпусына Жоғарғы Сот Төрағасы Асламбек Мерғалиев таныстырды.
Салтанатты рәсімге Қарағанды облысының әкімі Ермағанбет Бөлекпаев, судьялар, сот жүйесінің ардагерлері, құқық қорғау және мемлекеттік органдардың басшылары, сондай-ақ өңір соттарының қызметкерлері қатысты.
Іс-шара барысында Жоғарғы Сот Төрағасы зейнеткерлікке шығуына байланысты қызметін аяқтаған бұрынғы облыстық сот төрағасы Ерден Әріповке өңірдің сот жүйесін дамытуға қосқан үлесі үшін алғыс айтты.
Асламбек Мерғалиев Ғалым Құлекеевтің сот жүйесінде мол тәжірибесі бар, судьялар қауымдастығы арасында жоғары беделге ие кәсіби маман екенін атап өтті. Оның айтуынша, жаңа төрағаның басшылығымен Қарағанды облыстық соты сот төрелігінің сапасын арттыру, азаматтар мен ұйымдардың құқықтарын тиімді қорғау, сондай-ақ қоғамның сот билігіне деген сенімін нығайту бағытындағы жұмысты жалғастырады.
Кездесу соңында Жоғарғы Сот Төрағасы өңірдің судьялар корпусы алдында тұрған негізгі міндеттерге тоқталып, заң үстемдігін қамтамасыз етуге, сот практикасының біркелкілігін сақтауға, соттардың ашықтығы мен сот төрелігін жүзеге асыру сапасын арттыруға ерекше назар аударылатынын айтты.
АНЫҚТАМА
▪️ Ғалым Батырбекұлы Құлекеев 1979 жылы Жамбыл облысы Қаратау қаласында дүниеге келген.
▪️ 2000 жылы әл-Фараби атындағы Қазақ мемлекеттік ұлттық университетінің заң факультетін бітірген.
▪️ 2002 жылы – М.Х.Дулати атындағы Тараз мемлекеттік университетінің экономика факультетін, ал 2024 жылы – сол ЖОО заң факультетінің магистратурасын аяқтаған.
▪️ 2000-2007 жылдары сот жүйесі мен мемлекеттік органдарда түрлі қызметтер атқарды,
▪️ 2007-2010 жылдары – Астана қаласы Алматы аудандық сотының судьясы,
▪️ 2010-2012 жылдары –Жамбыл облысы Жамбыл аудандық сотының төрағасы,
▪️ 2012-2024 жылдары – Жамбыл облыстық сотының судьясы.
▪️ 2024 жылдан бастап қазіргі уақытқа дейін – Қарағанды облыстық сотының азаматтық істер жөніндегі сот алқасының төрағасы.
