Жамбыл облысы Жуалы ауданында құс фермасы тұрғындарды құс етімен қамтамасыз етуде.
Айнагүл Ахмедбекова аталған кәсіп түрін ауданда алғашқылардың бірі болып ашқан. Құс фермасы биылғы жылдың мамыр айынан бастап жұмыс жасауда.
Жалпы кәсіпкердің бұл салада жұмыс жасап жатқанына 5 жылдан аса уақыт болған. Оның айтуынша бұл отбасылық бизнеске айналып кеткен. Бүгінде құс фермасында 400 үндік, 360 қаз, 600 үйрек, 1500 дей тауық бар. Кәсіпкердің айналысып жатқан бағыты ет болғандықтан, инкубаторға арналған құс жұмыртқаларын шет елден тапсырыспен алдырады. Үндік және қаз жұмыртқалары инкубатордан шыққан соң балапандар 3-4 айда союға жарап қалатын көрінеді. Кәсіпкер өз үйінде инкубатор орнатып, айына 45 000-ға жуық балапан басып шығарады екен, оның ішінде 15 000 жұмыртқа өздеріне тиеслі болса, қалғаны аудан тұрғындарының тапсырысымен инкубатордан шығарылады.
Жеке кәсіпкер табиғи таза құс етімен айналысатын болғандықтан бүгінде халал сертификатына ие болған.
Ферма өнімдері Жамбыл, Алматы облыстарының дүкендеріне сатылымға шығарылуда. Жалпы құс фермасының аумағы 1,1 гектарды қамтыса, құс фермасына арналған сарай 250 квадрат метрді құрайды. Айнагүл Ахмедбекова алдағы уақытта құс фермасының аумағын үлкейтіп, ет өнімінің көлемін арттыруды мақсат етуде. Айта кету керек, кәсіпкер 2020 жылы инвестициялық жобаға арналған грантты иеленген.
Өңірлік коммуникациялар қызметі
