Облысымызда жайылымды тиімді пайдалану бойынша аудандарда ауыл шаруашылық жерлері түгендеуден өткізілді. Нәтижесінде, босалқы жер қоры нақтыланды, оның ішінде егістік 23981 гектар, 1 226 399 гектар жайылым жер бар. Бұл туралы бүгін ӨКҚ алаңында облыстық жер қатынастары басқармасының басшысы Бахтияр Көпбосынов айтты.
Облыстың жер қорында жерлердің барлық санаттары бойынша 8,1 млн. гектар жайылымдықтар бар. Бұл статистикалық есепке сәйкес, облыста тіркелген 860,2 мың бас шартты мал басына шаққанда 9,0 гектардан айналды. Яғни, қолда бар жайылым қорын пайдалануды дұрыс ұйымдастыра білсек, жайылым жер жеткілікті деуге негіз бар — деді Б.Көпбосынов.
Жер пайдалану бойынша прокуратура өкілдерімен бірлесіп аудандарда жиындар өткізілген. Нәтижесінде, жеке қосалқы шаруашылықтарда тіркелген мал басына 683 мың гектардан астам жайылым жетіспейтіндігін көрсетіліпті. Ұйымдастырылғын жұмыстың арқасында қазіргі уақытта облыс бойынша малдарды шығару үрдіске айналып, бүгінге 773 пада мал жайылымға шығарылған. Бұл ауылдық округтерге бекітіліп берілген 363 мың гектар жайылым жерлер көлемінің жүктемесін азайтуға өз септігін тигізген.
Кейбір ауылдық окруктердің ауыл тұрғындары малдарын жыл бойы елді мекендер маңында ұстап, сауын малынан өзге мал басын шалғайдағы жайылымдарға шығару ұмыт қалған. Бұл кейбір ауыл әкімдерінің бұл әселемен айналыспайтындығын көрсетеді. Мысалы, Байзақ ауданында Түймекент, Қостөбе, Сарыкемер, Жамбыл ауданында Қарасу, Қызылқайнар, Ақбастау, Жуалы ауданында Ақсай, Қошқар ата, Шақпақ, Қордай ауданында Қарасу, Қасық, Шу ауданында Көкқайнар, Жаңажол, Меркі ауданыда Меркі, Ақарал ауылдық округтерінде тұрғындар аулада ветеринарлық нормадан артық мал ұстап отырғандығы көрсетті — деп атап өтті спикер.
Спикердің айтуынша, заңға сәйкес 1 бас малға қажетті шаршы метр жер есебінде қанша басқа дейін мал ұстауға болатындығы заңдастырылған. Мысалы, азаматтың өзіндік қосалқы шаруашылығында 0,15 га (1500 ш/м) жер болса, оның шамамен 700 шаршы метрінде тұрғын үйі мен ауласы орналасады. Сонда қалған 800 шаршы метр жерде 20 бас ірі мал немесе 65 бас ұсақ мал ұстауы қажет. Өкінішке орай, заңнамаларды осы талаптары орындалмай отыр.
Қалыптасқан жағдайдан шығу үшін қос бағыт қолға алынған. Бірінші бағыт — босалқы жер қорындағы жайылымдарды елді мекендерге бекітіп беру. Бұл бағытта нақты жоспар белгіленген алты айдың қорытындысымен 17,6 мың га жайылым елді мекендерге берілді. Бұл көрсеткіш республика бойынша біздің облыс көш бастап тұр.
Келесі бағыт елді мекендерге жақын мал аяғы жететін 5 шақырымдық аралықтағы жайылымдарды мемлекетке қайтарып, ауылдық округтерге бекітіп беру бағыты бар жоғы 366 гектар болып орындалған. Бұл мәселемен тек Жамбыл, Жуалы, Меркі аудандары ғана айналысып, басқа аудандарда қолға алынбаған, — деді спикер.