Жамбыл облысы Шу ауданына қарасты Жаңа жол ауылының 96 жастағы тұрғыны Ифрат Халяпова коронавирусқа қарсы екпенің екінші дозасын қабылдады. Жасы жүзге таяп қалса да жеке басының ғана емес, туыстарының да саулығына алаңдаған кейуана 12 мамыр күні «Спутник-V» вакцинасының алғашқы дозасын салдырған.
Ауылдағы дәрігерлік амбулаторияның учаскелік медбикесі Гүлмира Алиеваның айтуынша, Ифрат Нуруллақызының жағдайы бірқалыпты. Тұтастай алғанда Жаңа жол ауылында 2910 адам тұратын болса, оның 1341-і вакцина салдыруы тиіс. Бүгінгі таңда 572 тұрғын ерікті түрде екпе салдырды. Олардың қатарында Ифрат Халяпова да бар.
«Ифрат Халяпова бұған дейін денсаулығына байланысты шағымданған емес. Екпе салдырмас бұрын әжейдің денсаулығының дұрыстығына әбден көз жеткізіп, қажеті шаралардың барлығын жасадық. Күнделікті жағдайын біліп тұрамыз,» — дейді медбике.
Ифрат Нуруллақызы Ұлы Отан соғысы кезінде де тылда еңбек етіп, жеңісті жақындатуға айрықша үлес қосқандардың бірегейі. Сондай-ақ бұрынғы жылдары қант қызылшасымен аты шыққан Шу ауданының беделді қызылшашыларының бірі болған. Балтамырдың бабын тауып, құрметке де бөленген. Бүгінгі таңда 6 баласынан өрбіген 13 немере-шөберелерінің ортасында шаттыққа толы күн кешіп отырған әжеміз аурудан айығудың жалғыз жолы — екпе салдыру екенін айтады.
«Мен екпені өзім үшін салдырған жоқпын. Артымнан ерген ұл-қыздарым мен немере-шөберелерімнің денсаулығына алаңдадым. Бұл індеттен жапа шеккендерді көзімізбен көрдік. Жақыныңнан айырылудың қаншалықты ауыр екенін жақсы білемін. Сондықтан кеш болмай тұрғанда вакцина салдырып, кеселдің жолын ертерек кесу керек» — дейді Ифрат Халяпова.
Расымен де, шулық кейуананың бұл ісі көпке үлгі болуы тиіс. Жалпы шалғайдағы Шу ауданында 100 мыңнан аса тұрғын бар болса, оның 49271 тұрғынына вакцина салдыру жоспарланған. Маусым айын есептегенде барлығы 13369 адам вакцина қабылдапты. Әзірге жоспар 27,1 пайызға ғана орындалып отыр. Дегенмен соңғы күндері екпе салдыруға ниетті тұрғындар саны едәуір арта түскен.
Өңірлік коммуникациялар қызметі
