Бүгінгі таңда өңірдегі жалпы пайдаланымдағы автомобиль жолдарының ұзындығы 10 079 шақырымды құрап отыр, оның ішінде 1187 шақырымы республикалық маңызы бар стратегиялық нысандар болып табылады. Осы бағыттағы өзекті мәселелер мен атқарылып жатқан шаралар «AMANAT» партиясы Жамбыл облыстық филиалы жанындағы Партиялық бақылау комиссиясының кезекті отырысында жан-жақты талқыланды.
2026 жылы жергілікті маңызы бар жолдар мен елді мекен көшелерін ретке келтіру мақсатына бюджеттен 21,5 млрд теңге көлемінде қомақты қаражат бөлініп, қазіргі уақытта 75 инвестициялық жоба кезең-кезеңімен іске асырылуда. Бұл қаржыландыру аясында барлығы 165 шақырым жол құрылыс, қайта жаңғырту және орта жөндеу жұмыстарымен қамтылады деп жоспарланған.
Нақтырақ айтқанда, қазіргі таңда облыс бойынша 5 көпірдің құрылысы қатар жүріп жатыр, сондай-ақ 6,6 шақырым жол толықтай қайта жаңғыртылып, тағы 158,4 шақырым жол орта жөндеуден өткізілуде. Бұл жұмыстар тек жергілікті деңгеймен шектелмейді; атап айтқанда, республикалық маңызы бар «Қарасу–Масаншы–Сортөбе», «Тараз–Қайнар» және «Шу–Қайнар» автожолдарында да кең көлемді жөндеу шаралары ұйымдастырылған. Жол жүру қауіпсіздігін жоғары деңгейде қамтамасыз ету үшін биыл 105 мың шаршы метрден астам аумақта шұңқырларды жамау жұмыстары жүргізіліп, 3899 жаңа жол белгісі орнатылады және 2560 шақырым жолға жаңадан таңбалар сызылады.
Партиялық бақылау комиссиясы бұл жобалардың белгіленген мерзімде аяқталуын және құрылыс материалдарының сапа стандартына сай болуын жіті қадағалап, әрбір бөлінген теңгенің тиімді жұмсалуын бақылауда ұстайды.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
