Жамбыл облысында соңғы тәулікте коронавирус ауруының 21 жаңа жағдайы тіркелді.
Атап айтқанда, облыс орталығында екі жаңа жағдай анықталды. 1981 жылы туған ер адам және 1986 жылы туған әйел бұған дейін ауырғандармен байланыста болып, жұқтырып алған.
Жамбыл және Байзақ аудандарында бір-бір жағдайдан тіркелді. Науқастардың бірі 39 жастағы ер адам болса, екіншісі 5 жасар бала. Олар да жақын байланыста болған тұлғалар болып табылады.
Сондай-ақ, Атырау облысы Теңіз вахталық кентінің келген қызметкерлер арасында тоғыз оқиға анықталды.
Белгіленген алгоритмге сәйкес олар облысқа келгеннен соң карантиндік стационарға оқшауланған.
Үш науқас 1963, 1984 және 2003 жылдары туған Тараз қаласының тұрғындары болып табылады. 7 жасар қыз бұған дейін ауырған тұлғамен байланыста болғандығы үшін карантиндік стационарға оқшауланған. Сондайақ, 36 жастағы әйел туыстарымен қарым-қатынас жасау нәтижесінде, ал 57 жастағы Тараз тұрғыны жұмыстағы әріптесімен қарым-қатынас жасау барысында инфекция жұқтырған.
Сондай-ақ, COVID-2019 диагнозы Шу ауданының 69 жастағы тұрғынынан расталды. Одан созылмалы ауруына байланысты жоспарлы түрде талдаулар алынған.
COVID-2019 диагнозы облыс орталығының 1993 жылы туған екі тұрғынында расталды. Олар бұған дейін індет жұқтырған науқаспен байланыста болған.
Сондай-ақ, Тараз қаласының 65 жастағы тұрғыны дене қызуының жоғарылауына қатысты шағымданып, медицина қызметкерлерімен ауруханаға жатқызылды. Одан алынған зертханалық талдаулар коронавирусқа оң нәтиже берді.
Тағы бір жағдай Байзақ ауданында анықталды. Науқас — 26 жастағы жігіт. Ол да бұған дейін инфекция жұқтырғандармен байланыста болған.
Жаңа жағдайлар бойынша байланыста болған 21 тұлға анықталып, карантинге оқшауланды.
Ағымдағы жылдың 2 мамырындағы жағдай бойынша Жамбыл облысының аумағында коронавирустық инфекцияның 140 жағдайы тіркелген, оның ішінде Тараз қаласында — 64, Байзақ ауданында — 7, Жамбыл ауданында — 5, Қордай ауданында — 36, Меркі ауданында — 3, Шу ауданында – 2, Мойынқұм ауданында – 1.
Сондай-ақ, Дели — Тараз рейсі жолаушылары арасынан алты оқиға, Теңіз вахталық кентінен келген жұмысшылар ішінен 16 оқиға анықталды.
Барлық ауырғандардың 47-сі емделіп, дәрігерлердің бақылауындағы үй карантиніне шығарылды.
