Бұл туралы өңірлік төтенше жағдайлар департаменті бастығының міндетін атқарушы Ералы Ақылбеков баяндама жасады.
Спикердің мәліметінше, жыл басынан бері облыс аумағында 807 өрт оқиғасы тіркелді. Қоғамдық резонанс тудыратын ірі өрт жағдайлары орын алған жоқ. Келтірілген материалдық шығын 97 млн теңгені құрады.
2025 жылдың 15 қазанында басталған жылыту маусымы келер жылдың 15 сәуіріне дейін жалғасады. Осыған байланысты тұрғын үй секторында өрт қауіпсіздігі айлығы жарияланып, оның аясында өрт пен улы газдан улану оқиғаларының алдын алу және оған жол бермеу мақсатында кең көлемді түсіндіру жұмыстары жүргізілуде. Бүгінгі күнге дейін 12 500 тұрғын үй араланды.
Жылыту маусымы кезінде адамдардың өрт салдарынан қаза болу қаупін азайту мақсатында 28 000 азаматқа нұсқаулық берілді. Пештерді және электр қондырғыларын пайдалану кезіндегі қауіпсіздік талаптарын түсіндіру бағытында 300-ге жуық жиын өткізіліп, оған 3 500 адам қатысты. Білім беру мекемелерінде 13 595 оқушы мен тыңдаушыны қамтыған 97 ашық сабақ ұйымдастырылды.
Ералы Ақылбековтің айтуынша, жылыту маусымында қайғылы жағдайлардың алдын алу үшін әлеуметтік аз қамтылған, көпбалалы және мүгедектігі бар отбасылардың 2 878 тұрғын үйі нақтыланып, толықтай араланды. Әлеуметтік осал санаттағы отбасылардың үйлеріне барлығы 1 696 датчик орнатылды. Оның ішінде: улы газды анықтайтын – 970 дана, табиғи газды анықтайтын – 726 дана құрылғы бар.
Ербол Қарашөкеев тұрғын үй секторында өрттің алдын алу жұмыстарының тиімділігін арттыруды тапсырды. Әсіресе әлеуметтік осал топтар тұратын үйлерде профилактикалық рейдтерді көбейту қажеттігін ерекше атап өтті.
Сондай-ақ электр және жылыту жүйелерінің қауіпсіздігін тексеруді, ақауы бар пештер мен электр сымдарын дер кезінде анықтап, оларды жөндеу немесе ауыстыруға көмек көрсетудің тетіктерін қарастыруды міндеттеді. Бұдан бөлек, ерікті өрт сөндіру жасақтарының материалдық-техникалық базасын нығайтып, олардың дайындық деңгейін көтеруді міндеттеді.
Қатты отынмен жылытылатын үйлердегі түтін тартқыштар, мұржалар және желдету жүйелерінің талапқа сәйкестігін жүйелі тексеру де басым бағыт ретінде белгіленді.
Аппараттық кеңесте 2025 жылға арналған облыстық бюджеттің қосымша резервтерін қалыптастыру жол картасының іске асырылу барысы да жан-жақты сараланды.
Облыс әкімдігі
