Жамбыл облысы әкімдігінің білім басқармасының ұйымдастыруымен «Білімді ұлт – мемлекет дамуының тұрақты кепілі» атты облыстық тамыз конференциясы өтті.
Жаңа оқу жылының басты міндеттерін айқындаған алқалы жиынға облыс әкімі Сапарбаев Бердібек Машбекұлы, білім басқармасы мен білім бөлімінің қызметкерлері, мектеп директорлары, ардагер ұстаздар мен білім мекемелерінің үздік педагогтары және де өңірімізден бейнебайланыс арқылы мектеп мұғалімдері қатысты.
Конференция барысында облыстық білім басқармасы басшысының міндетін атқарушы Жамалов Т. С., ҚР Ыбырай Алтынсарин атындағы Ұлттық білім Академиясының президенті Бейсембаев Ғ.Б., ата-аналар комитетінің төрағасы Нұрақбаев Р.Д., облыстық полиция департаментінің «Жергілікті полиция» қызмет басқармасының бастығы, полиция полковнигі Әшкеев Р.Д., облыстық ерекше дарынды балаларға арналған мамандандырылған «Дарын» мектеп-интернатының тарих пәнінің мұғалімі, «Қазақстанның еңбек сіңірген ұстазы» Бегілдаева М.С. баяндамаларын оқыды.
Жиында облыс әкімі Бердібек Машбекұлы білім саласындағы бірқатар өзекті мәселелерге тоқталып, тапсырмалар берді. Қиындыққа қарамастан оқу жылын жақсы аяқтағаны үшін ұстаздар қауымына алғыс айтты. Сонымен қатар, пленарлық мәжіліске қатысушылар тарапынан ұтымды ұсыныстар айтылып, алдағы жаңа оқу жылына қойған мақсат-міндеттер сараланды.
Іс-шара соңында өскелең ұрпақты оқыту мен тәрбиелеу ісінде қол жеткізген табыстары мен білім саласына сіңірген еңбектері үшін бірқатар педагогтар облыс әкімінің Құрмет грамотасы, «Еңбек ардагері» медалімен, «Қазақстан Республикасының білім беру ісінің құрметті қызметкері» және «Ы.Алтынсарин» төсбелгілерімен марапатталды.
Жаңа оқу жылында келешегі кемел елдің тәрбиелі де білімі терең шәкірттерін тәрбиелеу жолында ұстаздарға үлкен міндет артылып отыр.
Дереккөз – Жамбыл облысы әкімдігінің білім басқармасы
