Наурыз мерекесі қарсаңында Жамбыл облысының барлық аумағында «Бірге таза Қазақстан» акциясы өтті. Шара аясында сенбілік ұйымдастырылып, ағаш көшеттері отырғызылды.
Жамбыл ауданынының тұрғындарының қатысуымен 250 арша және туя ағашы отырғызылды. Шараға аудан әкімі Ерлан Қыдыралыұлы қатысты. Ол күтіп, баптау жұмыстарына баса назар аудару керектігін жеткізді. Тазалық жұмыстарына 2800 азамат, 16 арнайы техника жұмылдырылып, 80 тонна қоқыс шығарылған.
Ал, Т.Рысқұлов ауданында 1000 түп көшет отырғызылды. Аудан әкімі Ернар Есіркепов ауыл ақсақалдары бірге «Жеңіс саябағы» аумағында декоративті шырша көшеттерін отырғызды. Сондай-ақ, акция аясында көктемгі көріктендіру, көгеріштендіру және санитарлық тазалық жұмыстары жүргізіліп, 13000 шақырым арықтар мен каналдар, 64 шақырым көше жолдары тазаланып, 14 тонна қоқыс шығарылды.
Сондай-ақ аудан көлемінде Наурыз мейрамына арналған мерекелік шаралар жалғасуда. Білім ошақтары мен мекемелерде “Бауырсақ пати” акциясы, ұлттық нақыштағы сәндік-қолданбалы көрмелер, ұлттық ойындардан түрлі жарыстар ұйымдастырылып, өнерпаздар мен өнерсүйер жастар ән шырқап, күй тартып, аудан тұрғындарына мерекелік көңіл-күй сыйлауда.
Қордай ауданында 1 наурызда бастау алған көктемгі абаттандыру және тазалық екі айлығы бүгінде жалғасты. Аудан әкімі Бекзат Болатбековтің, мекемелер мен ұйымдардың қызметкерлерінің қатысуымен 1000 түп емен ағашының көшеттері отырғызылды.
– Көктем айында көшеттер отырғызылады, одан кейін барлығы ұмыт қалады. Оны күту, суару, баптау мәселесіне мән берілмей келеді. Абаттандыру жұмысы есеп үшін емес ертеңгі болашақ үшін, ауыл ажары, ауа тазалығы үшін болу керек», — деді аудан әкімі.
