«Жамбыл облысы жастар маслихаты» жігерлі жастардың шоғыры
«Жамбыл облысы жастар маслихаты» жастар қоғамдық бірлестігі өз жұмысын 2010 жылы бастады. Ұйымды құрып, осы күнге дейін тізгінін Исламбек Дастан ұстап келеді. Камал Тұрлыхан төрағалық етсе, атқарушы директор қызметін Жандос Дүйсетов есімді азамат атқаруда.
Бірлестік Жамбыл облысы аймағындағы жастардың белсенділігін арттырып, жергілікті мемлекеттік басқару органдарымен, облыстық, қалалық, аудандық ұйымдармен тығыз араласып, жастардың мүддесін білдіретін облыстағы жастар саясатын қалыптастыру бағытында жұмыс жасайды. Мұнымен қоса ұйым жастардың мүдделері мен құқықтарын білдіру және қорғау, жастар бойында құқықтық және саяси мәдениетті қалыптастыру, жас азаматтардың әлеуметтік мәселелерін шешуге қатысуларын қамтамасыз етеді. Соңғы бес жылда ұйымның мемлекеттік әлеуметтік тапсырма шеңберінде атқарған жұмыстары орасан. Жамбыл облысы әкімдігінің денсаулық сақтау басқармасы №1 қалалық емханасының әлеуметтік тапсырмасы шеңберінде «Тең-теңімен» қағидасымен салауатты өмір салтын насихаттау бойынша облыстағы оқу орындарында түрлі семиналар, тренингтер, дөңгелек үстелдер мен тимбилдинг ойындары өткізілді. Тағы да ауыз толтырып айтарлық жетістіктердің бірі, жастар бойында радикалды діни ағымдарға қарсы иммунитет қалыптастыру, халықтың діни сауаттылық деңгейін арттыру, жас ұрпақ арасында дəстүрлі рухани- адамгершілік құндылықтарды насихаттау бағытындағы əлеуметтік жобаны іске асыру бойынша семинарлар оң нәтижесін беруде.
Ұйым мүшелері жастарға өз құқықтарын білу үшін заңдарды оқытумен де айналысады. Шаһарымыздың жөнделмеген жолдары мен лас жерлерін, қоғамдық көліктердің заң бұзушылық фактілерін суретке түсіріп, түрлі хэштегтермен әлеуметтік желіге жариялап, жастарға ғаламтор арқылы да бағыт бағдар беруде. Ағымдағы жылдың 16 қарашасынан бастап «Жамбыл облысы Жастар маслихаты» ЖҚБ ның «Жас депутаттар» корпусының ІІІ шақырылымына сайлау жүргізілуде. Сайлауға Жамбыл облысының барлық оқу орындарынан 16 мен 22 жас аралығындағы үміткерлер қатысып жатыр.
Келешекте келелі жұмыстарды атқарып, қоғамға қалтықсыз қызмет етуді көздейтін «Жамбыл облысы Жастар мәслихаты» жастар қоғамдық бірлестігі алдағы уақытта ұйым мүшелерінің санын көбейтіп, жастардың бойында саяси сауаттылықты дамыту, өз құқығын қорғауды, Жамбыл облысындағы жастар арасындағы проблемаларды шешуге атсалысуды жоспарлап отыр. Ертеңіне бек сенімді, қоғамда қозғаушы күш саналатын бірлестіктің бағындырар белесі биік екендігінің сеніміміз зор.
TURANINFO.KZ
