Жамбыл облысы Байзақ ауданы Түймекент ауылдық округіне қарасты Ақжар ауылында Тәуелсіздіктің 30 жылдығы және Елбасының «Болашаққа бағдар: рухани жаңғыру» бағдарламасы аясында «Ардагерлер аллеясы» ашылды. Ауыл тұрғындарының және жомарт азаматтардың демеушілігімен бой көтерген «Ардагерлер» аллеясында Ұлы Отан соғысының жылдары (1941- 1945) қашалып жазылған ескерткіш тақта орнатылған.
Кірпіштен өріліп, гранитпен қапталып бой көтерген 4 бөлімнен тұратын тақтада өр рухты бабалардың есімдері жазылған. Атап айтқанда, «Боздақтар» бөлімінде Ұлы Отан соғысында қаза тапқан боздақтардың есімдері, «Ардагерлер» бөлімінде соғыстан оралып, туған жердің әл-ауқатын көтеруге атсалысқан еңбек ардагерлерінің тізімдері енгізілген.
Сонымен қатар «Ақжар ауылының батырлары және тарихи тұлғалары» бөліміне осы өңірден шыққан біртуар даңқты тұлғалардың есімдері енгізілсе, «Тыл еңбеккерлері» бөлімінде тылда еңбек еткен қариялар мен әйелдер және бұғанасы қатпаған ұл-қыздардың есімдері қашалып жазылған.
Бұдан былай, Отан қорғауға аттанған батырлардың арнайы тақтаға жазылған есімдері елге ұлағат, ұрпаққа өнеге сыйлап тұрары анық.
Елорда күні қарсаңында ел игілігіне берілген аллея жастардың өткен тарихын танып-білуін ықпал ететіндігін атап өткен аудан әкімінің орынбасары Дәуір Дәулетов, аталған нысан құрылысына атсалысқан барша азаматтарға аудан әкімінің Алғыс хатын табыстады.
Өңірлік коммуникациялар қызметі
