Стоматит – ауыздың, тілдің, қызыл иектің шырышты қабаттарының қабынуы. Ол — ауыз қуысы қабынып, арты өңез бен жараларға ұласудан басталады. Егер дер кезінде дұрыс ем қабылдаған жағдайда, бір аптаға жетпестен жазылып кетуге болады.
Дерт қоздырғыштары болып табылатын бактериялар қалып кетсе, қайтадан пайда болуы мүмкін. Ата-аналар «ауыздың уылуы» деп атайтын бұл ауру көбіне 5 жасқа дейінгі балаларда кездеседі.
Жақында облыстық стоматологиялық емханасына Германияда шығарылған «FONALaser» деп аталатын диодты лазерді жергілікті инвестор демеушілік көмек ретінде сыйға тартты. Оперативті түрде тез, әрі сапалы ем-дом жүргізуге, сондай-ақ балалардың қорқыныш сезімдерін басып, ата-ана мен баланың дәрігерге деген сенімін қамтамасыз етуге арналған құрылғының көмегімен жұмсақ тіндердің хирургиясы, породонтология, эндодонтия, бактериялардың санын азайту, ауырсынусыз емдеу және ағарту сияқты ем-шаралардың кең ауқымды спектрін орындауға болады.
Аталған құрылғы алынғалы бері емханада 43 ересектер мен балаларға ем жасалған. Жабдық ақылы бөлмеде орналасқанымен, оны тегін медициналық кепілдендірілген көмек және міндетті медициналық сақтандыру қызметі аясында алуға болады.
Стоматитті емдеумен қатар, ол аурудың алдын-алуға қатысты ем шараларын да жасаған жөн. Жеке бас гигиенасын сақтап, ауыз қуысын дұрыс тазалау керек. Аурудан айыққан соң, тіс щеткасы мен гигиеналық және косметикалық заттарды ауыстыру қажет.
Жамбыл облысы әкімдігі денсаулық сақтау басқармасының баспасөз қызметі
