Бұрын айтылғандай, 2025 жылы Қазақстан аумағында 2,1 млн га алаңда үйірлі шегірткенің таралуы болжанып отыр. Бұл өткен жылмен салыстырғанда 1 млн га-ға аз болғанмен, әсіресе, Қостанай (650 мың га), Ақтөбе (512,9 мың га) және Батыс Қазақстан (134,5 мың га) облыстарында көптеп таралуы мүмкін. Барлық өңірде мониторинг жүргізіліп, қорғаныс шаралары жасалуда.
«27 мамырдағы жағдай бойынша, шегірткенің пайда болу орнын анықтау үшін 4,1 млн га жер зерттелді. Дернәсілдер қоныс тепкен жалпы аумақ 1,1 млн га. Оның ішінде 667,8 мың га алдағы уақытта өңделеді. Жалпы 596,3 мың га өңделді. Жамбыл облысында мароккалық шегірткеге қарсы химиялық өңдеу аяқталып, италиялық прусқа қарсы шара жалғасуда. Түркістан облысындағы жұмыс аяқталып қалды. Өңірде барлығы 370,6 мың га өңделіп, тазалау жұмысы жүргізілуде», — деді ауыл шаруашылығы вице-министрі Ермек Кенжеханұлы.
Үйірлі шегірткеге қарсы химиялық өңдеу Абай (4 мың га), Ақмола (6 мың га), Ақтөбе (51,9 мың га), Алматы (6,3 мың га), Атырау (10,1 мың га), Шығыс Қазақстан (1,4 мың га), Жетісу (21,8 мың га), Батыс Қазақстан (16,2 мың га), Қарағанды (4,5 мың га), Қостанай (40,6 мың га), Ұлытау (1,8 мың га) мен Қызылорда (13,1 мың га) облыстарында да жүргізіліп жатыр. Павлодар мен Солтүстік Қазақстан облысында италиялық прусқа қарсы шаралар өңделетін алаң анықталғаннан кейін басталады.
Еске салсақ, үйірлі шегірткемен күреске республикалық бюджеттен 7,1 млрд теңге бөлінген. Биылғы маусымда 443 мамандандырылған бүрку техникасы, оның ішінде 31 аса жеңіл авиация кемесі, 24 ұшақ пен 49 ҰҰА жұмыс істейді. Барлық өңірде жергілікті жұмысты үйлестіру үшін облыс әкімдерінің орынбасарлары басқаратын жедел штабтар құрылған.
Жалпы республика бойынша 4 625-тей адам тексеру жұмысына кіріскен. Бұл өткен жылмен салыстырғанда екі есе көп. 2024 жылы Ауыл шаруашылығы министрлігі 56 агродрон сатып алған еді. Оның 7-еуі шегірткенің таралу ошағын анықтауға, 49-ы химиялық өңдеуге арналған.
«Осы маусымда зерттеуші дрондар Түркістан облысында шегіртке ошағын өте дәл анықтауда. Бүгінде ол Жамбыл, Ақтөбе, Қостанай, Қызылорда, Батыс Қазақстан мен Ұлытау облыстарында да қолданылып жатыр», — деді Ермек Кенжеханұлы.
Бүріккіш дрондар қазірдің өзінде барлық өңірде көптеп қолданылуда. Оның көмегімен 52,5 мың гектар жерді өңдеу жоспарланып отыр.
Штаб отырысында Серік Жұманғарин зиянкестен қорғану шаралары қызу жүргізіліп жатқан өңірлерді тыңдады. Атап айтқанда, Қызылорда облысында қатты желдің және шегіртке дернәсілінің адам аяғы жетпейтін жерге ұялауының салдарынан химиялық өңдеуге әуе техникасының шамасы жетпеуде. Мөлшерден тыс көп пестицид те қажет. Вице-премьер осындай жағдайда жұмыс істей алатын газ генераторы секілді жерүсті техникасын көптеп жеткізуді тапсырды.
«Әлі де шегіртке табиғи таралу циклінің шыңына жеткен жоқ. Егінге зиян келтірмеу үшін өңірдегі жағдайға орай жедел әрекет етуіміз керек. Туындаған проблемаларды тез шешу үшін республикалық штабтың апта сайынғы отырысын өткізуіміз қажет. Бүгінгі отырыста қабылданған шешім, екі күннің ішінде Қызылорда облысына қажетті дәрі-дәрмек пен қосымша техника жеткізілуі тиіс», — деп қорытындылады Серік Жұманғарин.
Үкіметтің баспасөз қызметі
