Облыс, қала басшылығы мен шаһар тұрғындары Т.Рысқұлов атындағы саябақта Астана қаласында өткен Отан қорғаушы күні және ҚР Қарулы Күштерінің 25 жылдығына орай ұйымдастырылған әскери парадты тікелей эфирден тамашалады.
Еліміздің тарихында айрықша датаға, яғни, Қарулы Күштердің құрылуының 25 жылдығына тұспа-тұс келген әскери парадтың тікелей көрсетілімін аймақ басшысы Кәрім Көкрекбаев пен қала әкімі Рүстем Дәулет тамашалады. Сондай-ақ осы күні ұйымдастырылған Тұңғыш Президент саябағынан — Төле би және Абай даңғылымен және
Мәңгілік алау мемориалынан Төле би және Абай даңғылымен майдандық әндерді шырқап жүріп өткен Тараз қалалық горнизон бөлімшелерінің әскерилері мен мектеп оқушылары да елорда төрінде өткен әскери парадқа куә болды.
Әскери парадқа арнайы келіп қатысқан, Мемлекет басшысы Нұрсұлтан Назарбаев қазіргі таңда елмен бірге қарулы күштер де тарихи модернизациядан өтіп жатқанын, барлық блоктың негізгі бағыты — терроризммен күрес екендігін жеткізді. Сондықтан Қазақстан қай жақтан келсе де кез келген қауіпке тойтарыс бере алатындығын мәлім етті.
– Біз қазіргі таңда әлемдік талаптарға сай келетін әлеуетті әскерімізді жасақтадық. Ел қауіпсіздігінің басты бағыттары айқындалды, әскери доктринамыз қабылданды. Экономикамыз қарқынды дамыған сайын еліміздің қарулы күштері де нығая түсіп, әскери қауіпсіздігіміз «Қазақстан-2050» бағдарламасының басты бағдарларының бірі болып саналады. Жауынгерлеріміз әлемнің әр түкпірінде бітімшілік миссияларынан өтіп, оны абыроймен атқарып шықты. Біздің әскеріміз ТМД мемлекеттерінің ішінде алдыңғы қатарлы әскер ретінде дамуда, – деген Нұрсұлтан Әбішұлы Қарулы Күштердің даму жолына кеңінен тоқталып өтті.
5 мыңнан астам сарбаз қатысқан саптық шеру барысында Қазақ әскерінің тәуелсіздік жылдарында жеткен жетістіктерін көрсету үшін лек-легімен танкілер, зеңбіректер бас-аяғы 300-ден аса әскери техника жүріп өтті. Биыл алғаш рет көпшіліктің назарына багги, квадроциклдер, ұшқышсыз басқарылатын ұшу аппараттары ұсынылды. Ал 70-ке жуық ұшақ пен тікұшақ таңдай қақтырар іс-қимылдың түр-түрін жасап, авиашоу көрсетті. Сондай-ақ әуеде қалықтаған тікұшақтар ҚР Қарулы Күштерінің 25 жылдығына орай, аспанда қалықтап, 25 санын бейнеледі. Сонымен қатар парадты тамашалаушылар алғаш рет өз көздерімен 2016 және 2017 жылдары әскеріміздің арсеналын толықтырған су жаңа әскери техниканы, заманауи қару-жарақ үлгілеріне куә болды.
Парадты шаһар тұрғындарымен тамашалған өңірдің сан-саласында еңбек етіп жүрген қызметкерлер әскеріміздің ширек ғасыр ішінде қуаты артып, әлем армиясымен иық тіресе аларлық дәрежеге жеткендігін алға тартты.
– Әскери шеру – мерекелік немесе көзтартарлық іс-шара ғана емес, Қарулы күштеріміздің жауынгерлік қуатын, армиямыздың техникалық тұрғыда жабдықталуын, еліміз бен халқымыздың егемендігі мен қауіпсіздігін күзетіп жүрген әскери қызметшілердің жауынгерлік әзірлігі мен жауынгерлік қабілеттілігін көрсету болып табылады. Бүгінгі парадты көру арқылы айбын әскеріміздің дамығанына куә болдық. Осы арқылы тәуелсіздігіміздің тұғыры берік қолда екендігіне тағы да бір рет көзіміз айқын жетті, – дейді «Нұр Отан» партиясы Тараз қалалық филиалы төрағасының бірінші орынбасары Арын Асқарбеков.
Шынболат Сейдуалиев
