Облыс əкімі Кəрім Көкірекбаев автобекет аумағынан бой көтеретін 14-ші шағын ауданның құрылыс жобасымен танысты.
«Қоғамдық келісім» мекемесінде аймақ басшысын жаңа шағын ауданның макетімен Ұлттық құрылыс саласы қауымдастығының төрағасы Мұхит Әзербаев таныстырды. Автобекет жанынан бой көтеретін ауданның жалпы аумағы 100 гектарды құрайды екен. Ол шағын ауданның 355 мың шаршы метрлік бөлігіне көп қабатты тұрғын үйлер салынатын болады. Ондағы пәтерлердің жалпы саны 5 мың 460-ты құрайды.16 мың тұрғынға шақталған ауданда 250 орындық 3 балабақша мен 1200 оқушыға арналған 2 орта мектеп, спорттық, медициналық, балаларды сауықтыру кешендері мен заманауи сауда нысандары бой көтермек. Мұхит Бақытұлы аталған шағын ауданға Абай көшесі арқылы баруға да болатынын айтады. Оның сөзінше, Сыпатай батыр көшесімен шектесіп жатқан Абай көшесінің құрылысы жалғастырылып, көлденең жатқан темір жолды қиып өту арқылы шағын ауданның арасымен Алматы -Ташкент бағытындағы үлкен жолға қосылады екен. Аталған көшенің бойына алдағы уақытта тұрғын үйлер салынатын көрінеді.
– Таныстырылып отырған жоба алғаш 2013 жылы қаралған болатын. Осыған дейін жоба бірнеше рет егжей-тегжейлі нақтыланып, көптеген өзгерістер енгізілді. Шағын аудан Алматы-Ташкент бағытындағы Тараз қаласына кіреберісі тұсынан салынады. Бұл жаңа шағын аудан әрі қаланың кіреберісі болғандықтан, жобада көп ерекшеліктерге мән беріліп отыр. Айта кетер бір өзгешелік, салынатын тұрғын үй, кинотеатрлар, мейрамханалар мен қонақ үйлер, сауда, спорттық-медициналық, сауықтыру кешендері секілді кез келген әлеуметтік нысан заманауи сәулеттік үлгіде тұрғызылатын болады. Аталған аумақта, сондай-ақ мұз алаңы, саябақтар да орналастырылады. Шағын аудан арқылы өтетін Абай көшесі мен Жамбыл даңғылының қиылысынан көрікті алаң ашылады. Жалпы мұнда барлығы 49 көп пәтерлі тұрғын үй салынады. Оның ішінде 27-сі – 5, 16-сы – 9, алтауы – 12 қабатты тұрғын үй, – дейді Мұхит Әзербаев.
Кәрім Нәсбекұлы аталған шағын ауданның құрылыс жобасымен танысқаннан кейін, онда негізінен жастар тұратынын тілге тиек етіп, ол шағын ауданды «Жастар қалашығы» деп атауды ұсынды. Сонымен қатар қалашыққа көрік қосу үшін саябақтардан бөлек, өзге де жерлерге субұрқақтар орнату, сауда үйлерін үлкен көшенің бойына емес, мейлінше тұрғын үйлерге жақын орналастыру керектігін жеткізіп, жобаға осы мәселелерге қатысты бірқатар түзетулер енгізуді тапсырды.
Шынболат СЕЙДУАЛИЕВ
