Қордай аудынында “Жұмыспен қамту жол картасы 2020” бағдарламасының орындалу туралы Жамбыл облыстық Қоғамдық кеңестің отырысы өтті. Отырыста негізгі баяндаманы Жамбыл облысы әкімдігі экономика және бюжеттік жоспарлау басқармасының басшысы Гүлдана Жауынбекова, қосымша баяндаманы жұмыспен қамту және әлеуметтік бағдарламаларды үйлестіру басқарма басшысының орынбасары Кенжебек Олжабай, Қордай ауданы әкімі Рүстем Дәулет, Жамбыл облыстық Қоғамдық кеңесінің мүшесі Қасымхан Төлендиев сөз сөйледі. 
Отырысқа барлық аудандар мен Тараз қаласы әкімдіктерінің өкілдері zoom платформасы арқылы байланыста болды.
Облыстық қоғамдық кеңестің президиум мүшесі, облыстық мәслихаттың хатшысы Бағлан Қарашолақов, облыстық қоғамдық кеңестің мүшелері Қайрат Шотбақов, Масат Берік, Жанат Бастаубаева, Такен Молдақынов, Исламбек Дастан және Қордай аудандық мәслихатының хатшысы Руслан Нұрсипатов жарыссөзге қатысып өз пікірлерімен бөлісіп, ұсыныстарын жеткізді.
Осы жерде бір айта кететін жәйт: отырыстан бір күн бұрын Жамбыл облыстық Қоғамдық кеңес төрағасы Әмзебек Жолшыбеков пен Бағлан Қарашолақов аудан басшыларымен бірге ауданның хал-ахуалымен, көптеген ауыл тұрғындарымен кездесіп халықтың ой-пікірлерін біліп қайтқан еді. Әмзебек Рысбекұлының айтуынша ауданда атқарылып жатқан қыруар жұмыстарға риза болған халық Елбасы Нұрсұлтан Назарбаевқа, Президентіміз Қасым-Жомарт Тоқаевқа және облыс әкімі Бердібек Сапарбаевқа алғыстарын айтыпты. Расында биыл облысқа, оның ішінде Қордай ауданына бұрын соңды болмаған мемлекет қаражаты бөлініп, мыңнан аса жобалар іске асуда. Облыс бойынша барлық мемлекеттік және салалық бағдарламалар аясында 144.8 млрд. теңге қаржыға 1387 жоба іске асырылды. Оның ішінде «Жұмыспен қамтудың жол картасы» шеңберінде 64.2 млрд. теңге бөлініп, 808 жоба орындалды. Нәтижесінде облыста 29 мыңнан аса жаңа жұмыс орны құрылды. Жыл соңына дейін бұл көрсеткіштер өседі.
Қордай ауданында Мемлекет басшысының тапсырмасымен көптеген нысандар қалпына келтіріліп, жаңа ғимараттар соғылып, жолдар жөнделіп, білім беру, денсаулық сақтау, мәдениет және спорт нысандары, аулалар абаттандырылып, жалпы 32 млрд қа жуық қаржыға 336 жоба іске асырылып, бұрын болмаған құрылыс жұмыстары атқарылған. Масаншы, Сортобе, Бұлар батыр, Қаракемер, Қарасу, Өтеген, Ауқатты, Қызылсай және екі Күнбатыс ауылдарына, құны 5.6 млрд теңге тұратын 73.2 шақырым газ құбырының құрылыс-монтаж жұмыстары жүргізілуде, аяқталуға жақын қалды. Сонымен қатар, Отар аумағындағы 12 ауылға да газ құбырлары тартылуда.
Күн тәртібіне қойылған мәселелерді жан-жақты талқылай келе, облыстық қоғамдық кеңес тиісті ұсынымдар қабылданды.
