Кездесудің басты мақсаты – жастар арасында жүктілікті жоспарлау мәселесі бойынша білім беру және денсаулықты сақтауға қатысты маңызды ақпараттарды жеткізу.
Аталмыш іс-шараға Жамбыл облысының денсаулық сақтау басқармасының «Жан-нұр» жастар денсаулығы орталығының психологы Гүлзира Бекболатқызы Қалдыбаева арнайы қатысты.
Гүлзира Бекболатқызы, жүктілікті жоспарлау процесінің маңыздылығын түсіндіріп, ата-аналық міндеттерді алдын ала ойластырудың, денсаулықты сақтау шараларын уақытында қабылдаудың отбасының болашағына тигізер оң әсері туралы айтып өтті.
Кездесу барысында психолог жүктілікті жоспарлау кезінде медициналық тексерулер мен қажетті дайындықтарды уақытылы өткізу, сондай-ақ психологиялық дайындықтың маңызды екенін атап өтті. Сонымен қатар, психологиялық аспектілердің жүктілік кезеңіндегі денсаулыққа әсері және болашақ ата-аналардың өзара түсіністік пен қолдаудың қажеттілігі туралы әңгімеледі.
Іс-шара барысында қатысушылар өз сұрақтарын қойып, маманның кеңестерін тыңдады. Жастар үшін бұл кездесу жүктілік жоспарлау жөніндегі ақпаратты кеңінен тарату мен халық арасында денсаулықты сақтау мәдениетін қалыптастырудың маңызды қадамы болды.
Бұл іс-шара жастардың денсаулығын жақсарту мақсатында ұйымдастырылған ауқымды жобалардың бір бөлігі болып табылады. Жамбыл облысының денсаулық сақтау басқармасы мен жастар ұйымдары бірге жұмыс істей отырып, облыс тұрғындарының денсаулығын қорғауға бағытталған көптеген іс-шараларды іске асыруда.
Кездесу соңында қатысушылар аталмыш тақырып бойынша өз тәжірибелерімен бөлісіп, келешекте осындай шаралардың жиі ұйымдастырылуын сұрады.
