Соңғы жылдары біздің еліміз «электрондық үкіметті» дамыту саласында айтарлықтай нәтижеге қол жеткізді.
Бұл халықаралық ұйымдардың рейтингісінде де көрініс тапты.БҰҰ-ның «электрондық үкіметтің» даму деңгейі бойынша соңғы зерттеуіне сәйкес 2020 жылдың қорытындысы бойынша 2018 жылмен салыстырғанда Қазақстан өз позициясын 10 тармаққа жақсартып, БҰҰ рейтингінде 29-орынды иеленді. Қол жеткізілген нәтижелер мемлекет басшылығының саяси қолдауының арқасында мүмкін болды және IT-қоғамдастықтың, «Ұлттық ақпараттық технологиялар» АҚ, «Astana Hub» халықаралық технопаркі, «Зерде» холдингі, Цифрлық даму министрлігі мен мемлекеттік органдар ұжымдарының ортақ еңбегі болып табылады.
Нарықтағы неғұрлым тартымды жағдайларға қарамастан, Цифрлық ведомство жүйесінде жылдар бойы еңбек етіп, мемлекеттік және қоғамдық секторды цифрландыруға үлкен үлес қосып келе жатқан мыңдаған қатардағы IT-мамандарға жеке алғысымызды білдіреміз.Өкінішке орай, корпоративтік басқару құрылымында белгілі бір мәселелер, соның ішінде жүйелік сипаттағы проблемалар да жинақталды.Зерде холдингі объективті және субъективті себептерге байланысты Ақпараттық коммуникациялық технологиялар саласын дамытудың толыққанды институты ретінде қалыптаса алмады.Бүгінде «Зерде» холдингі дербес табыс әкелмейді және өз кезегінде мемлекеттен «электрондық үкіметтің» ақпараттық-коммуникациялық инфрақұрылымы операторының функцияларын жүзеге асыруға тапсырыстар алатын «Ұлттық ақпараттық технологиялар» АҚ-ның дивидендтері есебінен қаржыландырылады.Мұны аудиторлық есептер растайды.Тұрақты шығынға әкелетін Холдинг қызметі, бюджеттен бөлінетін қаражат көлемі және «ҰАТ» АҚ-ның қаржылық жағдайы, басқарушы холдингті және еншілес ұйымдардың жұмысын қамтамасыз етуге кететін қаражат көлемі IT-қоғамдастық пен бақылау органдарының әділ сынына түсті.
2021 жылдың қорытындысы бойынша «Зерде» холдингінің табысының ұлғаюына әкелген «электрондық үкіметтің» ақпараттық коммуникация инфрақұрылымы мен ақпараттандыру объектілерін зерттеу жұмыстары — Цифрлық даму, инновациялар және аэроғарыш өнеркәсібі министрлігі тапсырысының арқасында мүмкін болды. Бұл «Зерде» холдингіне оң табыс әкелуге мүмкіндік берді, бірақ жылдың қорытындысы бойынша холдинг қызметі қайтадан шығынға әкеп соқты. Тұрақты сипатқа ие болған проблемаларға есеп комитеті соңғы тексерудің қорытындылары бойынша ерекше назар аударды. 2016-2021 жылдар кезеңінде Холдингтің жинақталған шығыны 7 млрд. теңгені құрады.Қазіргі уақытта «Зерде» Холдингінің құрылымында үш еншілес ұйым бар: «Astana Hub» технопаркі «Ұлттық ақпараттық технологиялар» және «Qazinnovations» акционерлік қоғамдары.Бұл ретте еншілес ұйымдар өз қызметінің негізгі бағыттары бойынша тікелей Цифрлық даму министрлігімен және мемлекеттік органдармен өзара іс-қимыл жасайды.Корпоративтік басқару холдингтік компанияда шоғырланған, ал негізгі бағыты бойынша еншілес ұйымдарға жетекшілік етуді уәкілетті орган тікелей жүзеге асыратын мұндай құрылым қажетсіз болып көрінеді.Сондықтан бүгінгі күні жаңа стратегиялық міндеттер мен ел басшылығының цифрландыру қарқынын жеделдету жөніндегі тапсырмаларын ескере отырып, Ақпараттық коммуникациялық технологиялар саласын басқарудың сапалы жаңа тетігін құру қажеттілігі туындап отыр.Бұл ретте алдағы трансформация корпоративтік басқарудың холдингтік құрылымын таратуға қатысты екенін және «Зерде» холдингінің өндірістік персоналына әсер етпейтінін ерекше атап өтеміз.
Бұл тұрғыда «сервистік интегратор» функцияларын «Цифрлық үкіметті қолдау орталығы» РМК-ға беру мәселесін де қарау қажет, оның негізгі міндеттері мемлекеттік басқаруды цифрлық трансформациялау процестерін әдістемелік және ұйымдастырушылық сүйемелдеу және барлық ұлттық жобалар мен бағдарламалық құжаттардың іске асырылуына мониторингті жүзеге асыру болып табылады.«Цифрлық үкіметті қолдау орталығы» РМК Мемлекет басшысының тікелей тапсырмасы бойынша мемлекеттік органдар үшін жетекші талдау орталығы ретінде құрылды.
Сондықтан Үкімет «сервистік интегратор» функцияларын «Зерде» — ден «Цифрлық үкіметті қолдау орталығы» РМК-на беру туралы шешім қабылдады, оның құрылымында Цифрлық трансформация орталығы жұмыс істейді.
Бұл ретте «Цифрлық үкіметті қолдау орталығы» РМК-ға жұмысқа ауысқан «Зерде» холдингінің бұрынғы қызметкерлері тиесілі барлық төлемдерді толық көлемде алады.Бүгінгі таңда кадрлық әлеуетті сақтай отырып, мемлекеттік IT-секторын басқаруды реформалау негізгі басымдық болып табылады. Бұл министрліктің, «Зерде» холдингінің және еншілес ұйымдардың ортақ міндеті.Министрлік қызметкерлердің ең жоғары әлеуметтік қорғалуын қамтамасыз ету қажеттігін және кейіннен олардың мамандығы мен біліктілігіне сәйкес жұмысқа орналасуын ескере отырып, олардың мүдделерін негізге алатын болады.Холдингті тарату кезінде қызметкерлер өздерінің алдағы еңбек қызметінің перспективаларына қатысты ойластырылған шешім қабылдаулары үшін бүкіл процесс ашық және айқын өтеді.
20 шілде күні цифрлық даму, инновациялар және аэроғарыш өнеркәсібі министрі Б. Б. Мусиннің Холдинг ұжымымен алғашқы кездесуі өтті, онда алдағы жоспарлар айтылып, алғашқы қадамдар талқыланды. Мұндай кездесулер холдингті тарату процесі барысында әріптестерімізбен тұрақты түрде өтетін болады.Қызметкерлердің басым көпшілігі жаңа жобалармен бірлесіп жұмыс істеуді жалғастыру үшін цифрлық ведомство жүйесінде қалады деп үміттенеміз.
