2017 жылдың 24-27 сәуір күндері аралығында Тараз қаласы жергілікті полиция қызметінің Жол патрульдік полициясы батальонында жол-патрульдік полициясы қызметкерлерінің қоғамдық тәртіпті сақтауды, жол қауіпсіздігін қамтамасыз етуді жүзеге асыруда білімдерін, дағдыларын жетілдіру мақсатында «Үздік маман — 2017» байқауы өткізілді.
Аталмыш байқауда батальон қызметкерлері кәсіби біліктіліктерін әр қырынан таныту үшін 7 номинация бойынша бақ сынасты. Оның ішінде нормативтік-құқықтық актілерді білу, атыс және қызметтік даярлық бойынша теория және практикалық сынақтар, дене шынықтыру даярлығы, қоян-қолтық ұрыс, алғашқы медициналық көмек көрсету практикасы, жол қиылысында қолмен реттеу, жеңіл және жүк көліктерімен қыс мезгілінде жылдам маневрлеу әдістерін көрсетті. 20-дан астам қызметкер қатысқан байқаудың нәтижесінде жан-жақты білімі мен біліктілік озықтығын дәлелдеген 3 қызметкер жүлделі орындарға ие болды. Атап айтсақ, байқаудың барлық талаптарын орындап, жеті кезеңде де жоғары көрсеткіштермен көзге түскен Жол патрульдік полициясы батальонының полицейі полиция аға сержанты Есимбеков Саясат Нұрғалиұлы бірінші орынды иеленсе, екінші орын Жол патрульдік полициясы батальонының полицейі полиция аға сержанты Абишкен Абылайхан Сауытұлына бұйырды. Ал жүлделі үшінші орынды Жол патрульдік полициясы батальонының полицейі полиция аға сержанты Бегім Айболат Қожымұлы иеленді. Жеңімпаздар арнайы алғыс хаттар және бағалы сыйлықтармен марапатталды.
Бұл байқау ел тыныштығын сақтап, өңірдегі құқықтық тәртіп пен қоғамдық қауіпсіздікті қорғаушы полиция қызметкерлерінің жан-жақтылығын, кәсіби шеберліктерін танытты.
Жамбыл облысы ІІД Баспасөз қызметі
