Қазақстан шахмат федерациясының президенті Тимур Турлов Халықаралық шахмат федерациясының (FIDE) президенті болып сайланды. Сайлау 26 қыркүйекте Өзбекстанның Самарқанд қаласында өткен FIDE Бас ассамблеясы аясында өтті.
Дауыс беруге ұлттық шахмат федерацияларының делегаттары қатысты. Президенттікке үш кандидат — Қазақстан атынан Тимур Турлов және Германия өкілдері Вадим Розенштейн мен Ян Хенрик Бюттнер таласты.
Бірінші турда Турлов 96 дауыс, Розенштейн — 76, Бюттнер — 20 дауыс жинады. Бірінші турда барлығы 192 жарамды дауыс есептелді.
Шамамен екі сағаттан кейін өткен екінші турда Тимур Турлов 110 дауыс жинап, жеңіске жетті. Оның қарсыласы Вадим Розенштейн 85 дауыс алды. Осылайша қазақстандық кәсіпкер FIDE тарихындағы сегізінші президент атанды. 38 жастағы Турлов ұйым тарихындағы ең жас сайланған президент болды.
Ол 2018 жылдан бері FIDE-ні басқарған Аркадий Дворковичтің орнына келді.
Сайлау нәтижесі жарияланғаннан кейін Турлов өзіне көрсетілген сенім үлкен жауапкершілік жүктейтінін айтып, әлемдегі ұлттық шахмат федерацияларын күшейту және олардың дербестігін арттыру бағытындағы жұмысты жалғастыратынын мәлімдеді.
Қазақстан шахматынан – әлемдік шахмат басшылығына
Тимур Турлов 1987 жылғы 13 қарашада дүниеге келген. Ол Freedom Holding Corp. компаниясының негізін қалаушы және бас атқарушы директоры.
2023 жылдан бері Қазақстан шахмат федерациясын басқарады. Сондай-ақ халықаралық мектеп шахматы қозғалысын дамытуға атсалысып келеді.
Турловтың президенттік командасында FIDE президентінің орынбасары қызметіне шахматтан бес дүркін әлем чемпионы Вишванатан Ананд ұсынылды. Бұл президенттік тандем FIDE сайлауына ресми түрде тіркелген үш команданың бірі болды.
Жаңа президент өз бағдарламасында FIDE қызметін цифрландыру, ұлттық федерацияларды қаржылай және институционалдық тұрғыда қолдау, шахматтың медиа кеңістіктегі үлесін арттыру, онлайн инфрақұрылымды және алаяқтыққа қарсы технологияларды дамыту мәселелеріне басымдық берген.
Тимур Турловтың сайлануымен Қазақстан өкілі алғаш рет әлемдік шахматты басқаратын FIDE президенті қызметіне келді.
TURANINFO.KZ
