Жамбыл облысы әкімінің бастамасымен қолға алынған «Әулиеата – кітап оқитын өңір» акциясы аясында Жамбыл облыстық көзі көрмейтін және әлсіз көретін азаматтар кітапханасында жазушы, драматург, публицист Елен Әлімжан Әбдуатұлының 80 жылдық мерейтойына арналған «Текті сөздің төресі» атты ерекше форматтағы әдеби кездесу өтті. Іс-шараның басты мақсаты – қаламгердің өмір жолын, шығармашылық мұрасын дәріптеу және оқырманға оның әдеби әлемін кеңінен таныстыру.
Кеш барысында жазушыға арналып «100 сұрақ» форматында тағылымды сұхбат ұйымдастырылып, Елен Әлімжанның ел білмейтін қырлары мен шығармашылық өрнектері жан-жақты ашылды.
Әдеби кеш ерекше сахналық қойылыммен ашылды
Шара Елен Әлімжанның шығармашылығын айшықтайтын сахналық қойылыммен басталып, қаламгердің «Аққұмнан шыққан баламын», «Сері аға» әндері орындалды. Кешке жазушының шәкірттері, қоғам қайраткерлері мен зиялы қауым өкілдері қатысып, жазушы туралы естеліктерімен бөлісті. Жүрекжарды тілектер мен жылы лебіздер шығармашылық кештің мән-маңызын одан әрі тереңдетті.
Брайль және аудиоформаттағы кітаптардың тұсаукесері өтті
Кеш аясында жазушының екі бірдей еңбегі –
-
«Бауыржанның пырағы»,
-
«Абайтаудың арғы жағы мен бергі жағы»
Брайль қарпіндегі және аудио нұсқада жарық көріп, ресми түрде таныстырылды. Арнайы әзірленген кітаптардың бір данасы №2 «Болашақ» мектеп-интернатының тәрбиеленушілеріне табысталды.
Шараның тиімділігі
Іс-шараға жалпы 50 оқырман қатысып, әдеби кеш қатысушыларға рухани серпін беріп, өңірде кітап оқу мәдениетін насихаттауға өз үлесін қосты.
