Көктем – жаңару мен тазалықтың мезгілі. Осы орайда Мойынқұм ауданында 2025 жылғы 14 ақпандағы аудан әкімдігінің №47 қаулысына сәйкес көріктендіру, абаттандыру және санитарлық тазалау жұмыстары басталып кетті. Аталған бастама аясында 12 сәуір күні аудан орталығында кең көлемді сенбілік ұйымдастырылды.
Сенбілік жұмыстарына аудан әкімі Ермек Карентаев арнайы қатысып, тұрғындармен бірге тазалық жұмыстарына белсене атсалысты. Бұл жолы негізгі жұмыстардың бірі – Омаров көшесінің соңында орналасқан тұрмыстық қатты қалдықтар полигонын тазарту болды. Аталған учаскеде 160 адам жұмылдырылып, экологияға зиян келтіретін қоқыс қалдықтары толығымен жиналып, аумақ тазарды.
Жалпы аудан бойынша бұл күні 501 адам сенбілікке қатысып, ауыл ішіндегі көшелер мен жаяу жүргінші жолдарын қоқыстан тазартты. Сонымен қатар, ағаштар мен жиектерді әктеу, гүлзарларды ретке келтіру сияқты жұмыстар да атқарылды.
Аудан әкімінің айтуынша, тазалық – тек әкімдік немесе коммуналдық қызметтердің міндеті емес, бұл – әрбір тұрғынның ортақ жауапкершілігі:
– Қоршаған ортаны таза ұстау – өзіміз үшін жасалатын жұмыс. Қоқыстан арылу – сыртқы сұлулықты арттыру ғана емес, бұл денсаулығымызды сақтау, мәдениетті қоғам қалыптастыру деген сөз. Ауылдың көркі – тазалығында. Оны сақтау – бәріміздің азаматтық борышымыз, – деді Ермек Карентаев.
Мойынқұмда басталған көктемгі көріктендіру жұмыстары кезең-кезеңімен жалғасатын болады. Аудан әкімдігі тұрғындарды тазалықты сақтауға, сенбілік жұмыстарына белсене қатысуға шақырады. Өйткені, таза ауыл – көрікті ауыл, ал көрікті ауыл – бақытты өмірдің кепілі.
