Күн тәртібінде көтерілген мәселе бойынша энергетика және тұрғын үй-коммуналдық шаруашылығы басқармасының басшысы Ғалым Исақов хабарлама жасады.
«Таза Қазақстан» республикалық экологиялық акциясы аясында елді мекендерді абаттандыру және санитарлық тазалау жұмыстары тұрақты түрде жүргізіліп келеді.
Бұған қоса 2025 жылдың наурыз-сәуір айларында Тараз қаласы мен аудандарда көктемгі 2 айлық сенбілік өткізілді. Оған 10 мыңға жуық адам үлес қосты.
«Таза Қазақстан» акциясына 89,5 мың жамбылдық, 58 ірі және 400-ден астам шағын кәсіпорын қатысты.
Бүгінге дейін 30 тарихи-мәдени ескерткіш, 79,2 мың тұрғын үй ауласы, 2,7 шақырым көше жолдары, 803,8 шақырым арық жүйесі мен канал, сондай-ақ 641,1 мың шаршы метр саябақ пен сквер аумағы тазаланды. 6,1 мың тонна күл-қоқыс шығарылды.
«TazaQazBot» телеграм-ботына өңір тұрғындарынан 542 өтінім түсті.
Акция аясында жергілікті полиция қызметі аумақтарды абаттандыру қағидаларын бұзу және ортақ пайдаланымдағы орындарға қоқыс тастау бойынша 21,7 мың фактіні анықтап, 196,8 млн теңге айыппұл салды.
Сондай-ақ «Жасыл белдеу» құру, «TazaLike», «Әр ауылдық округке 2000 тал егу» іс-шаралары аясында 286,9 мың көшет отырғызылды.
Биыл облыс елді мекендерін абаттандыру, көгалдандыру және санитарлық тазалау жұмыстарына 14,6 млрд теңге қаралды. Оның 2,3 млдр теңгесі игерілді.
Облыс бойынша тұрмыстық қатты қалдықтарды шығару қызметімен 40 мекеме (91 бірлік техника) айналысады. Барлығы 524 күл-қоқыс алаңшасында 4 014 дана контейнер орналасқан.
Басқарма басшысы елді мекендердің санитарлық жай-күйіне жүргізілген кезекті зерделеу қорытындысын баяндады. Кемшіліктердің басым бөлігі Тараз қаласы мен Талас, Т. Рысқұлов, Қордай аудандарында байқалады.
Аппараттық кеңес қорытындысы бойынша облыс әкімі Ербол Қарашөкеев абаттандыру, санитарлық тазалық және «Таза Қазақстан» экологиялық акциясы аясындағы жұмыстарды тиісті деңгейде ұйымдастыруды, әлеуметтік нысандарды, сквер, саябақтар мен балалар ойын алаңшаларын, сондай-ақ тұрмыстық қатты қалдықтар полигондарын ретке келтіру бойынша шаралар қабылдауды тапсырды.
Бұдан бөлек, жауапты тұлғаларға кездейсоқ қоқыс үйінділерін жою, жасыл желектер отырғызылған жер телімдерін қоршау, суғару және күтіп-баптау жұмыстарын күшейту, тұрғындар арасында тазалық мәдениетін арттыру, Жуалы, Меркі, Мойынқұм, Т. Рысқұлов ауданы әкімдеріне «TazaQazBot» телеграм-ботының қызметін жандандыру міндетін қойды.
Жамбыл облысының әкімдігі
