140 мыңға жуық бас ауыл шаруашылығы жануарлары эвакуацияланды. 12 450 мал бас шығыны орын алды. Өлген малдардың өлекселері жиналып, жойылды. Залал 100% өтелді. Бұл туралы Орталық коммуникациялар қызметінде өткен баспасөз конференциясында ауыл шаруашылығы вице-министрі Аманғали Бердалин айтты.
«7 өңірде 10 565 ауыл шаруашылығы жануарлары үшін 2,4 млрд тг сомасында төлемдер жүргізілді. Ақмола, Қарағанды және Батыс Қазақстан облыстарында 1885 бас ауыл шаруашылығы жануарлар шығыны өтелді. Төлем жүргізілген барлық өтінімдер әлеуметтік көмек ақпараттық жүйесіне енгізілді. Су тасқынының зардаптарын жою бойынша іс-шаралар кешенді эпизоотиялық жағдайды сақтауға аурулардың өршуіне және су тасқыны зардаптарын өтеуге мүмкіндік берді», – деді спикер.
Министрлік республикалық эпизоотияға қарсы отрядқа облыстардағы жергілікті атқарушы органдармен бірлесіп, өлген жануарлардың өлекселері мен қалдықтарын жоюға көмек көрсетті. Отрядта барлық қажетті құрал-жабдықтар және жою іс-шараларын жүргізуге арналған дезинфекциялық құралдар болды. 90 арнайы техника мен 146 адам жеке құрам жұмылдырылды. 3 облыста Сібір жарасының 12 көміндісі және 8 мал қорымы су астында қалды.
Министрліктің аумақтық бөлімшелері Республикалық ветеринариялық зертханамен бірлесе отырып, судың тартылуына байланысты аталған қорымдардан топырақ сынамаларын алды. Сібір жарасының көмінділерінің жер бетіне шығуы анықталған жоқ. Теріс нәтиже алғаннан кейін барлық қорым отряд күшімен профилактикалық дезинфекциядан өтті. Аурулардың алдын алу шаралары, оның ішінде жануарларды аса қауіпті ауруларға қарсы вакцинациялау жұмыстары жүргізілді.
