Қазақстан Республикасының Мәдениет және ақпарат министрлігінде 2025 жылғы «Отанды сүю жүректен» республикалық конкурсының ақшалай жүлде қорын беру жөніндегі комиссия отырысы өтті.
Комиссия отырысына Қазақстан Республикасы Мәдениет және ақпарат министрлігінің Архив, құжаттама және кітап ісі комитетінің төрағасы Али Рустам төрағалық етті. Отырыс барысында мемлекеттік рәміздерді насихаттауға бағытталған үздік шығармашылық жұмыстар қаралып, жеңімпаздар анықталды.
«Елдіктің асқақ айбыны» номинациясы бойынша І орынды «Túrkistan» халықаралық газетінің тілшісі Арайлым Бимендиева иеленді. ІІ орын Айгерим Оспанова мен Алпамыс Файзоллаға, ал ІІІ орын Жанна Бахатай, Айдана Бисекенова және Айнура Полатоваға берілді.
«Рәміздерім – мақтанышым» номинациясында І орын Жамбыл облысынан қатысқан мобилограф Елнұр Серікке бұйырды. ІІ орын Дамир Нұрқасымға, ІІІ орын Аружан Нұрланбекке табысталды.
Ал, «Туған жерім – Қазақстаным» номинациясы бойынша оң нәтиже көрсеткен үміткерлер болмағандықтан, аталған номинация өткізілмеді деп танылды.
Конкурс мемлекеттік рәміздерді дәріптеу, азаматтық жауапкершілікті арттыру және шығармашылық бастамаларды қолдау мақсатында ұйымдастырылды.
