10 желтоқсан Тараздағы кәсіпорындардың бірінде жұмысшы қайтыс болды. Қайғылы оқиға «Запчасть» АҚ Тараз зауытында орын алған. Жұмысшылардың бірі жанып тұрған пешке құлап кетті.
Араға біраз уақыт салып болған оқиға бойынша әкімдіктің еңбек инспекциясы тексеру жүргізбейді деген ақпарат таралған болатын.
Жамбыл облысы әкімдігі еңбек инспекциясының басшысы Жарылқасын Айтақов Orda.kz тілшісіне оқиғаға қатысты пікір білдірді.
– Қайтыс болған адаммен жұмыс берушінің арасында еңбек шарты болмаған. Екі жақ азаматтық құқықтық негіздегі шарт арқылы жұмыс істеген. «Еңбек кодексіне» сәйкес прокуратураның рұқсатымен ғана тексере аламыз. Прокуратура рұқсат бермесе қызметімізді асыра пайдалану болып кетеді. Негізі орын алған жазатайым оқиғадан кейін облыс әкімдігінде жиын өтіп, басқарма басшысы «Запчасть» АҚ басшылығына қызметкерлермен азаматтық негіздегі шарт емес, еңбек шартымен жұмыс істеуді ұсынған болатын.
Бұл соңғы үш айдағы «Запчасть» АҚ компаниясында екінші адам өлімі тіркелген жазатайым оқиға. Ағымдағы жылдың 9 қазанда болат құю кезінде шөміштен ыстық болат шашырап, нәтижесінде жұмысшыларды күйік шалып, 3 жұмыскер зардап шекті. Оқиға 1 адам өлімімен аяқталды. Бұндай жағдай бізді алаңдатады. Заң аясында жазатайым оқиғадан адам қайтыс болса, еңбек инспекторларына құқықтық формаға қарамай тексеру жүргізуге рұқсат берсе екен, – дейді Жарылқасын Айтақов.
Еске салсақ, бұған дейін Таразда зауыт жұмысшысының пешке түсіп кеткен сәті видеоға түсіп қалған.
