Іс-шараның басты мақсаты – өңірлік деңгейде ақпаратты сауатты жеткізу, заманауи медианың мүмкіндіктерін тиімді пайдалану және қоғаммен байланыс орнатудың жаңа тәсілдерін меңгерту.
Семинар барысында Жамбыл облысы әкімдігінің мәдениет және тілдерді дамыту басқармасының баспасөз хатшысы Ғалия Абылай «Медиа және ақпарат таратудағы сауаттылық» тақырыбында тәжірибелік бағыттағы дәріс оқып, қатысушылармен нақты кейстер мен практикалық мысалдар төңірегінде ой бөлісті. Спикер ақпараттың жеделдігі мен нақтылығы, аудиториямен дұрыс байланыс орнату, сондай-ақ әлеуметтік желілердегі контенттің сапасына ерекше тоқталды.
Сонымен қатар, медиаменеджер, кәсіпкер, Тараз қалалық мәслихатының депутаты, Taraz24 телеарнасының негізін қалаушы Зарина Қуаттегі заманауи медианарықтағы трендтер мен жеке бренд қалыптастырудың маңызын атап өтті. Ал Жамбыл облыстық Өңірлік коммуникациялар қызметінің директоры Алмат Садуақас мемлекеттік құрылымдар мен БАҚ арасындағы тиімді коммуникация орнату жолдарын кеңінен түсіндірді.
Іс-шара аясында «Анаға тағзым» Жамбыл облыстық отбасылық даму әлеуметтік орталығының бөлім басшысы Қымбат Нұрманалиева орталықтың негізгі бағыттары мен атқарылып жатқан жұмыстар туралы айтып, қатысушыларды тәжірибе алмасуға шақырды.
Семинар-тренинг барысында қатысушылар өзара пікір алмасып, сұрақ-жауап форматында кәсіби біліктіліктерін арттыруға мүмкіндік алды.
