«Таразға тарту» жобасы аясында Братская көшесіндегі №52 тұрғын үйдің жанындағы сквер ашылды. Аталған аумаққа Шу ауданы әкімдігі жауапты болып бекітілген болатын.
Жамбыл облысының әкімі Бердібек Сапарбаев облыс орталығын кезекті рет аралау барысында, жаңа скверге арнайы барып, танысты.
Жаңаша кейіпке енген аумаққа жаяу жүргінші жолдары төселіп, гүлзарлар орнатылған, суару жүйелері ретке келтіріліп, жарық шамдары, орындықтар, қоқыс жәшіктері қойылған. Ашылған ойын алаңшасы Тараз қаласы әкімдігінің дене шынықтыру және спорт бөлімінің қарамағына берілетін болады. Скверде «Стрит воркаут» әуесқойлары үшін де арнайы бұрыш қарастырылған.
— «Таразға тарту» жобасының арқасында облыс орталығында абаттандырылған саябақтар мен скверлер пайда болды. Балаларға арналған заманауи ойын алаңдары салынды. Барлық конструкциялар қауіпсіз материалдардан жасалған. Өкінішке орай, кейде ойын мен спорт алаңшаларының бұзылу жағдайларымен жиі күресуге тура келеді. Жергілікті тұрғындар алаңшаларды күтіп-ұстауға және бұзушылардан қорғауға атсалысу керек, — деп Бердібек Сапарбаев қалалықтарды ұқыпты болуға шақырды.
Тұрғындар аулаларында көпфункционалды алаңның ашылғанына қуанышты екендерін жеткізді.
— Балаларымыз енді бос уақыттарын осында тиімді өткізетін болады. Бұл жерде балалар ойнап, үлкендер тыныға алады, — дейді зейнеткер Нағызбек Бейсембеков.
Сондай-ақ, бұл күні облыс әкімі Бердібек Сапарбаев құрылыс-жөндеу жұмыстарының да барысын тексеріп, спорт нысандарын аралады.
Үшбұлақ каналы бойындағы аумақты абаттандырумен «Қазфосфат» ЖШС айналысуда. Мұнда шағын жағалау жасақталуда. Қарасу каналының бойында да осындай жұмыстар жүргізілуде.
Бұдан кейін Бердібек Сапарбаев 2002 жылдан бері жұмыс істеп келе жатқан №4 облыстық мамандандырылған балалар мен жасөспірімдер спорт мектебіне ат басын бұрды. Оның базасында Тараздағы ірі бассейндердің бірі «Дельфин» ашылған. Мектеп жаттықтырушылары табысты спортшылардың бірнеше буынын тәрбиелеп шығарған. Көптеген тәрбиеленушілері Қазақстанның ұлттық құрамаларында өнер көрсетеді. Мұнда мыңнан астам жас спортшы шұғылданады. Спорт мектебі жаттықтырушылар кабинеттерімен, душ кабиналары бар ұлдар мен қыздарға арналған киім ауыстыру бөлмелері мен асхана, техникалық кабинетер, заманауи тренажерлері мен спорт жабдықтары бар үлкен спорт залымен қамтылған.
Спорт мектебі жүзуден, су добынан және велоспорттан, триатлоннан, бессайыстан және үлкен теннис бойынша спортшылар дайындайды.
Олимпиадалық резервті даярлау орталығында сабақтар 9 түрлі бағытта өткізіледі десек, олар: еркін күрес, жеңіл атлетика, грек-рим күресі, бокс, дзюдо, ату, каратэ-до, таеквандо, үстел теннисі.
— Спорт залдары таңертеңнен кешке дейін, әсіресе демалыс және мереке күндері де ашық болуы тиіс. Балалар бос уақыттарын осында тиімді өткізулері керек, — деді аймақ басшысы.
Сол секілді, облыстық олимпиадалық резервтің мамандандырылған мектеп-интернат-колледжі 2004 жылы салынған.
Мекеме директоры Ақжүрек Таңатаров мұнда 20 жаттықтырушы жұмыс істейтінін, 200-ден астам спортшы жаттығатынын жеткізді. Барлық тәрбиеленушілер спорт мектебінің жатақханасында тұрады. Бокс, дзюдо, ауыр атлетика, еркін күрес, грек-рим күресі, футбол, таеквандо секциялары жұмыс істейді.
Облыс әкімімен спорт мектебінің ғимаратына жапсарлас құрылыс салу мәселесі талқыланды.
Қазір үстел теннисімен және көркем гимнастикамен айналысуға арналған спорт кешенінің құрылысы жедел қарқынмен жүруде. Нысанның жалпы ауданы — 11,9 мың шаршы метр десек, оның ішінде 2460 шаршы метрі – спорт залдарына тиесілі. Мердігер – «Тараз Строй 2004» ЖШС-і бүгінде ішкі аумақты ішкі безендіруге және абаттандырумен айналысуда.
Сондай-ақ, облыс әкімі барған келесі нысан – 1961 жылы салынған Д. Карбышев атындағы № 16 орта мектебі болды. Білім ордасының негізгі корпусының орнына қазір 348 орынға арналған жаңа ғимарат салынуда.
Өңір басшысы жауапты тұлғаларға құрылыс жұмыстарының сапасын бақылауды тапсырды. Сондай-ақ, Бердібек Сапарбаев іргелес аумақтардың тартымды заманауи көрінісін ойластыруды тапсырды.
— Жаңа мектеп заманауи, әдемі келбетке ие болуы керек. Білім басқармасы сәулетшілермен бірге мектептің ерекше, шығармашылық безендірілуін ойластыруы тиіс, — деді облыс әкімі.
Жамбыл облысы әкімінің баспасөз қызметі
