Үш күнге созылған театр мерекесі аясында Қырғызстан, Өзбекстан, Маңғыстау, Қарағанды, Шығыс Қазақстан облыстары мен Шымкент қаласынан келген театр ұжымдары және жамбылдық Тоқпанов театры көрермен назарына үздік қойылымдарын ұсынды. Жалпы саны жеті театр қатысқан фестиваль театрсүйер қауымға ерекше рухани әсер сыйлады.
Фестиваль барысында актерлік шеберлік, режиссерлік ізденіс, сахналық шешімдер мен заманауи театр бағыттары кеңінен көрініс тапты. Сонымен қатар халықаралық мәдени байланыстар нығайып, театр мамандары арасында тәжірибе алмасуға мүмкіндік туды.
Жабылу салтанатында Қазақстанның Халық әртісі, Мемлекеттік сыйлықтың лауреаты, профессор Тұңғышбай Жаманқұлов сөз сөйлеп, фестивальдің жоғары деңгейде ұйымдастырылғанын атап өтті. Ол қатысушы театр ұжымдарына, ұйымдастырушылар мен көрермен қауымға шынайы ризашылығын білдіріп, ерекше көзге түскен өнер иелеріне арнайы «Дара» медалін табыстады.
Сондай-ақ, Жамбыл облысы әкімдігінің мәдениет және тілдерді дамыту басқармасының басшысы Ерлан Жүнісбай фестиваль қатысушыларына алғыс айтып, шығармашылық табыс тіледі.
Фестиваль қорытындысы бойынша:
– «Актерлік дуэт» номинациясы Қырғызстандағы Шаршен Термечиков атындағы Шу облыстық музыкалық драма және сатира театрының «Илегилек» драмасындағы актер Нурсултан Кадыруулу мен актриса Аэлита Ысаковаға;
– «Ең үздік екінші пландағы әйел адам рөлі» номинациясы Қарағанды мемлекеттік «Халықтар достығы» орденді К.С.Станиславский атындағы орыс драма театрының «7» документальді спектакліндегі рөлі үшін актриса Ирина Городковаға;
– «Ең үздік екінші пландағы ер адам рөлі» номинациясы Райымбек Сейітметов атындағы Түркістан қаласының сазды драма театрының «Ханшаның көз жасы» драмасындағы Тағдыр рөлі үшін актер Шакен Амантұровқа;
– «Ең үздік әйел адам бейнесі» номинациясы Нұрмұхан Жантөрин атындағы Маңғыстау облыстық музыкалық драма театрының «Я – Қарлығаш» драмасындағы Зияш рөлі үшін актриса Гюль Зиятоваға;
– «Ең үздік ер адам бейнесі» номинациясы Өзбекстан мемлекеттік жастар театрының «Клятва» публицистикалық драмасындағы рөлі үшін актер Отабек Нематовқа;
– «Үздік актерлік ансамбль» номинациясы Шығыс Қазақстан облыстық драма және оперетта театрының жас көрермендер труппасы сахналаған «Ит» драмасына берілді.
Айта кетейік, фестивальдің қазылар алқасына Қазақстанның Халық әртісі, Мемлекеттік сыйлықтың лауреаты, профессор Тұңғышбай Жаманқұлов төрағалық етті. Сонымен қатар қазылар құрамында Қырғыз Республикасының халық әртісі, актер әрі кинорежиссер Бусурман Одуракаев және театртанушы, өнертану кандидаты, Қазақстанның еңбек сіңірген қайраткері Меруерт Жақсылықова болды.
