Сіздерге құрмет көрсету – мен үшін үлкен мәртебе. Алғы сөзді осылай бастағаным сіздерге деген риясыз көңілімнің бір парасы ғана. Сол кезде жас болсаңыздар да, ел ертеңі үшін Тәуелсіздікті аңсаған ата-бабаларымыздың жолын жалғастырып, Кеңестік кезеңдегі солақай саясатқа қарсы шықтыңыздар. Өскелең ұрпаққа үлгі, өрелі жанға өнеге болатын ерліктеріңізге, қайтпас жігерлеріңізге бас иемін.
Тәуелсіздік – ең алдымен ұлтымыздың ежелден бостандыққа деген асқақ рухының, өшпес жігерінің жеңісі. Ел тарихында тәуелсіздік үшін түрлі оқиғалар, көтерілістер мен бастамалар орын алып отырған. Солардың барлығының мақсаты бір болатын, ол – еліміздің тәуелсіздігін алу.
Тағы бір тарихи оқиғалардың ішінде 1986 жылғы қатпарлы аязды күндерде бодандыққа қарсы тұрып, егемен ел болуымызға себепкер болған боздақтардың ісі – көпке үлгі, құрмет тұтарлық. Себебі, сол алмағайып тұста жаппай бас көтерген қаншама жастың тағдырына балта шабылды. Әділетсізіктің салдарынан бірінің өмірі қиылды, қайсыбірі сотталды, не керек, талай жастың обалына қалған сол бір оқиғаның ызғары көптің санасын әлі сансыратуда. Халықтың жүгін көтерген олармен біз әрқашан мақтануға тиіспіз.
Бүгін ауданымызда есімдері мақтанышпен айтылатын Исмаил Ходжимурат, Назира Кеңесбаева, Мейрамкүл Айнабекова, Нүрила Муражанова, Қарлығаш Күзекова, Шолпан Сейдуалиева, Есенбек Әміртаев, Жамиля Дартаева, Жомарт Телеуов, Әшім Әбдіғапаров, Сәкен Мырзабай, Пшанов Кенжебай сынды Желтоқсан куәгерлерімен кездесіп, өткен-кеткеннен сөз қозғап, емен-жарқын әңгімелестік.
Сіздерді келе жатқан ұлық мерекемен құттықтай отырып, зор денсаулық, бақ-береке, отбасыларыңызға амандық тілеймін. Тәуелсіздігіміз тұғырлы болып, жүздеріңізден күлкі кетпесін
Сәкен Арубаев,
Жамбыл ауданының әкімі
