Бала көтерген сәтінен бастап, қаза болғанға дейінгі марқұм Әдемі Ешеналының денсаулық жағдайын жарты сағаттан астам уақыт баяндаған басқарма басшысының м.а сөзінен ұққанымыз, ана мен оның құрсақтағы сәбиінің өліміне дәрігерлердің салғырттығы сеп. Жасанды жолмен жүкті болған 25 жастағы келіншектің денсаулығы әу бастан-ақ қауіпті топтардың қатарына жатқызылған екен.
Ұсынылған медициналық құжаттаманы талдау нәтижесiнде мынадай фактілер анықталды: Жүктілікке байланысты есепке алу кезінде анамнез толық жинақталмаған. Бас ауруы кезінде 14 апта мерзімнен бастап анықталғанымен, себебі тексерілмеген. Жай-күйінің ауырлығына толық бағалау жүргізілмеген. Учаскелік акушер-гинеколог бетте және аяқ-қолда ісік болғанда емдеуге жатқызу мәселесін одан әрі шешу үшін консилиум шақырмаған. Жүкті әйелді жолдама бойынша ауруханаға жатқызу негізсіз. Қабылдау бөлімі жүкті әйелдің жағдайының ауырлығын назарға алмаған. Ауруханада жатқанда негізсіз токолиз жасалған, «Жүктілік кезіндегі артериялық гипертензия» талаптарын сақталмаған, аурухана дәрігерлерінің жоғары қауіп факторы бар жүкті әйелге динамикалық мониторингінің болмауы, бас дәрігердің емдеу ісі жөніндегі орынбасарының тексермегені және медициналық хабарланбағаны анықталып отыр,- деді Жамбыл облыстық денсаулық сақтау басқармасы басшысының м.а Ерік Мұсабаев.
Бүгінгі күні арнайы құрылған комиссия тобынан бөлек, бұл мәселені тыңғылықты зерделеу үшін тәуелсіз тексеру тобы да жасақталған. Олар екі бірдей адамның өліміне әкеп соққан қайғылы оқиғаға кінәлілерді анықтау үшін барымызды саламыз деп отыр.
— Қауіпті топтағы жүкті әйелдерге жүргізілуі тиіс медициналық әрекеттердің көпшілігі тиісті деңгейде орындалмаған, — дейді ана мен нәресте өлімі бойынша құрылған комиссия мүшесі Қаракөз Сағынғалиева.
Ендігі ақ халаттылардың немқұрайлылығы жауапсыз қалмақ емес. Жиында Шу қалалық ауруханасының бас дәрігерін орнынан босатып, денсаулық сақтау басқармасы басшысының м.а мен басқармаға қарасты ана және бала денсаулығы бөлімінің басшысына қатаң сөгіс беру ұсынылды.
Бұл мәселе бойынша облыс әкіміне облыс әкімдігінің денсаулық сақтау басқармасы басшысының м.а Ерік Мұсабаевқа қатаң сөгіс, Шу қалалық ауруханасының бас дәрігерін жұмысынан босату, облыс әкімдігінің денсаулық сақтау басқармасының ана мен бала денсаулығы бөлімінің басшысы Айжан Терлікбаеваға қатаң сөгіс, Шу аудандық ауруханасының бас дәрігерінің міндетін атқарушысының тәртіптік жауапкершілігін қарау бойынша ұсыныс беріледі. Сонымен қатар денсаулық сақтау басқармасына аталған жағдайға қатысы бар аурухананың қызметкерлерінің тәртіптік жауапкершілігін қарау ұсынылады,- деді облыс әкімінің орынбасары Серік Сәлемов.
Айта кететін жәйт, Жамбыл облысының Шу қаласында орын алған ана өліміне қатысты қайтыс болғанның жақындары дау көтерген болатын.
