Жиын барысында жол құрылысы жобаларының қазіргі жай-күйі талқыланды. «Тұранинфо» ақпарат агенттігінің тілшісі Исламбек Дастан онлайн форматта Жезқазған-Қызылорда, Шу-Қайнар және Жошы хан бағыттарындағы жолдардың жағдайына қатысты сұрақ жолдады.
Дархан Иманашевтің айтуынша, Жезқазған-Қызылорда автожолы бойынша негізгі жұмыстар аяқталған.
«Өткен жылы бұл бағытта қозғалыс толық ашылды. Қазір тек кейбір қосымша жұмыстар қалды. Жалпы көлік қозғалысы толыққанды күре жолмен жүзеге асып жатыр. Биыл Ұлытау облысы аумағында 208 шақырым жолда құрылыс жұмыстары жүргізілуде. Жобаны 2024 жылдың қыркүйегінде бастаған мердігерлер биыл жыл соңына дейін толық аяқтауды жоспарлап отыр», – деді ол.
Ал Шу-Қайнар автожолы 2021 жылы басталғанымен, жоба барысында бірнеше мердігер ауысқан.
«Алғашқы мердігер жұмыстарды сапасыз жүргізіп, жобаны тоқырауға ұшыратты. Оған айыппұл салынып, келісімшарт бұзылды. Екінші мердігер де осы жағдайды қайталады. Қазіргі таңда үшінші мердігерлер анықталды. Биыл қозғалысты толық ашу жоспарланып отыр», – деді басқарма төрағасы.
Сонымен қатар, «Жошы хан» автожолына қатысты сұраққа жауап берген Дархан Иманашев бұл жоба «ҚазАвтоЖол» құзыретіне кірмейтінін атап өтті.
Баспасөз конференциясында Жамбыл облыстық филиалына қатысты сыбайлас жемқорлық фактілері де сөз болды. Атап айтқанда, филиал басшысының орынбасары Дәурен Тультаевқа қатысты Қылмыстық кодекстің 189-190 баптары бойынша іс қозғалғаны айтылды.
«Қордай» автомобиль өткізу бекетіне байланысты іс бойынша қазіргі уақытта апелляциялық процесс жүріп жатыр. Біз бұл жағдайдан үлкен сабақ алдық. Қауіпсіздік қызметі құрылды. Соңғы екі жылда 12 құқықбұзушылық фактісі анықталып, оның үшеуі сотқа дейін жеткізілді», – деді Дархан Иманашев.
Оның айтуынша, Шу-Қайнар жолы бойынша мердігер электронды конкурс арқылы анықталған. Қазіргі таңда жобада ашықтықты қамтамасыз ету және сыбайлас жемқорлық тәуекелдерінің алдын алу бағытында жұмыстар күшейтілген.
Фото: kolesa.kz
