Жамбыл облысында көші-қон заңнамасын тексеру кезінде шетелдік жұмысшыларға қатысты істен кейін Сарысу аудандық полиция бөлімінің бастығының орынбасары сотталды. Сот үкімімен полиция подполковнигі Қанат Нарбеков алаяқтық жасауға оқталу және пара беруге арандату факілері бойынша кінәлі деп танылды.
Тергеу материалдарына сәйкес, Қанат Нарбеков 2025 жылдың қаңтарында Сарысу аудандық полиция бөлімі бастығының орынбасары қызметіне тағайындалған. Оның қызметтік міндетіне қоғамдық қауіпсіздік, көші-қон саласын бақылау, шетелдік жұмыс күшіне мониторинг жүргізу және әкімшілік өндірістерді қадағалау кірген.
2025 жылғы 14 мамырда Жамбыл облыстық полиция департаментінің көші-қон қызметі басқармасы Сарысу ауданында «Мигрант» профилактикалық іс-шарасын өткізген. Тексеру барысында China National Chemical Engineering Co., Ltd. компаниясында жұмыс істейтін Қытай Халық Республикасының 33 азаматы полиция бөліміне жеткізілген.
Құжаттарды тексеру кезінде 21 Қытай азаматының еңбек визасы жоқ екені анықталған. Осыдан кейін, тергеу нұсқасы бойынша, Қанат Нарбеков компания өкілдеріне тексерісті «тоқтатуға көмектесетінін» айтып, 2 миллион теңге талап еткен.
Компания өкілдері бұл туралы басшылыққа хабарлап, кейін жағдайға Ұлттық қауіпсіздік комитеті араласқан. 15 мамыр күні ҰҚК бақылауымен өткен кездесуде Нарбеков тексерушілерге «сыйақы беру қажеттігін» айтып, делдал арқылы ақша сұрауын жалғастырған.
2025 жылғы 16 мамырда түнгі уақытта Жаңатас қаласындағы Maki Maki дәмханасында 1,5 млн теңгені қолма-қол алған сәтінде ҰҚК қызметкерлері оны ұстаған. Жеке тінту барысында аталған ақша тәркіленген.
Сот шешімімен Қанат Нарбеков Қазақстан Республикасы Қылмыстық кодексінің алаяқтық және пара беруге арандату баптары бойынша кінәлі деп танылып, мемлекеттік қызметте лауазым атқару құқығынан өмір бойына айырылды. Сонымен қатар, оған 3 жыл мерзімге бас бостандығынан айыру жазасы тағайындалды.
Сот үкіміне сәйкес, ол жазасын орташа қауіпсіздік мекемесінде өтейді. Сондай-ақ сотталған азамат «полиция подполковнигі» арнаулы шенінен айырылды.
