«Еліміздің мемлекеттік басқаруындағы әрқилы буындары сияқты Экология министрлігінің қызметі де әртүрлі. Атап айтсақ: қоршаған ортаны қорғау, геология, су ресурстары, орман және жануарлар әлемі, балық шаруашылығы», — деді Экология министрлігінің басшысы резервшілермен кездесуде.
Ол жетекшілік ететін салалардағы ағымдағы жұмыс, негізгі проблемалар мен сын-тегеуріндер туралы егжей-тегжейлі айтып берді.
2021 жылы жаңа Экокодекс, «Жануарларға жауапкершілікпен қарау туралы» Заң қабылданды, Балық шаруашылығын дамытудың 10 жылға арналған бағдарламасы бекітілді, Ұлттық геологиялық қызмет құрылды. Мемлекет басшысының тапсырмасына сәйкес қазіргі уақытта жаңа Су кодексін әзірлеу бойынша жұмыстар жүргізілуде.
«Сіздер өз білімдеріңіз бен тәжірибелерңізді мен айтқан міндеттерді іске асыруда және аталған тәуекелдерді еңсеруде көмек көрсету үшін қолдана аласыздар деп ойлаймын. Егер сіздер қызығушылық танытсаңыздар, біз сіздерге министрліктегі бос лауазымдарды ұсынуға дайынбыз», — деді С.Брекешев кездесу барысында.
Іс-шара барысында қатысушылар министрліктің қызметі бойынша өздерін қызықтырған сұрақтарды қойып, елдегі экологиялық жағдайды жақсарту бойынша өз ұсыныстарын айтты.
Қазіргі уақытта Экология министрлігінде Президенттік кадрлық резервтен Экология, геология және табиғи ресурстар вице-министрі Зульфия Сүлейменова, Экологиялық саясат және тұрақты даму департаментінің директоры Ақзан Ширанов, Геология комитетінің төраға орынбасары Ерлан Ғалиев пен Елорданың экология департаментінің басшысы Дəурен Қазантаевтар еңбек етуде.