Қасым-Жомарт Тоқаев Жамбыл облысында іске қосылып жатқан ауқымды инвестициялық жобаның ел үшін стратегиялық маңызы зор екенін атап өтті.
Мемлекет басшысы Fufeng Group директорлар кеңесінің төрағасы Ли Сюэчуньді қабылдады. Кездесу барысында Жамбыл облысындағы жаңа кәсіпорынның индустриялық даму мен агроөнеркәсіптік биотехнология саласындағы орны талқыланды.
Ли Сюэчунь Қазақстанның аграрлық саласында ірі жобаларды жүзеге асыруға зор әлеуеті бар екенін жеткізді. Компания отандық диқандармен ұзақмерзімді серіктестік орнатып, жүгері сатып алуды, сондай-ақ жоғары оқу орындарымен бірлесіп білім беру бағдарламаларын әзірлеуді және кәсіпорын базасында R&D ғылыми-зерттеу орталығын құруды жоспарлап отыр.
