Осы аптада әкімдік отырысында СҚО әкімі Ғауез Нұрмұхамбетов өңірдегі су тасқыны жағдайы туралы айтты. Облыс әкімінің сөзінше, биыл Сергеев су қоймасында алғаш рет үшінші толқын байқалып отыр.
«Петропавлда тасқынның шарықтау шегі 28–30 сәуірде күтіледі», — деді өңір әкімі.
Ол Ақмола облысындағы Жабай және Қалқұтан өзендерінің көтерілуі үшінші толқынға себеп болғанын мәлімдеді. Ресми мәліметтерге сүйенсек, биыл өңірде су тасқынының жағымсыз салдарын болдырмау үшін ауқымды жұмыс істелген.
Алайда қабылданған шараларға қарамастан, аймақтағы су тасқынын толығымен жою мүмкін болмағаны байқалады. Есіл өзеніндегі су деңгейі көтерілуіне байланысты (24 сәуірде тәулік ішінде су деңгейі 29 сантиметрге, яғни 1119 сантиметрге дейін, қауіпті жағдайда 1130 сантиметрге дейін көтерілген) өзен арнасынан тасыған.
Қазір су Заречный кенті мен Речпорт маңындағы саяжай учаскелеріне жайылған. Бұл саяжайларда тұрғындар жоқ, ТЖД мен полиция бекеттері қойылған.
Заречный кентіне апаратын тасжолдарда тасқын су толуына байланысты қозғалыс қиындаған. ТЖД құтқарушылары тұрғындарды арнайы техника және көліктермен тұрақты тасымалдап жатыр.
СҚО ТЖД мәліметінше, Петропавл қаласының Заречный кентінде су тасқынынан қорғау жұмыстары жалғасып жатыр.
«ТЖМ Әскери бөлімдерінің жеке құрамы ТЖД қызметкерлерімен бірлесіп, қауіпті учаскелерде инертті материалдары бар қапшықтарды дайындап, төсеп жатыр», — деді ведомство өкілі.
Бұған дейін өңір әкімі Ойқала мен Былғары кентіндегі, Қызылжар ауданының Тепличное және Прибрежное ауылдарындағы жағдай ерекше бақылауда екенін мәлімдеген еді.
Алайда Прибрежное қазір сумен қоршалған. ТЖД мәліметінше, қазір тұрғын үйлерді су басу қаупі жоқ.
Тепличное ауылында да (Петропавл қаласының маңы) су басу қаупі бар, қазір бөгетті нығайту жұмыстары жалғасып жатыр.
