Ол күдіктіге қатысты қылмыстық іс аяқталғанын, ал қазір процеске қатысушылар қылмыстық іс материалдарымен танысып жатқанын мәлімдеді.
«Қылмыстық істі тергеу кезінде әртүрлі мөлшерде залал сомасы болды. Қазір 3,5 миллиард теңге шығын сомасына тоқталдық. Бұған дейін қылмыстық жолмен алынған ақшаны заңдастыру деректері туралы айтқан болатынмын. Қылмыстық жолмен алынған ақшаны заңдастыруға қатысты айтсақ, бұл тұста Перизат Қайрат гүл дүкенін сатып алуға ақша салған. Осылайша ол қоғамға өзін бизнес леди ретінде, бизнесте ақша табатынын көрсеткен», — деді Елемесов Сенатта өткен брифингте.
Журналистер ҚМА өкілінен Перизат Қайраттан алынған мүліктің болашағы туралы сұрады.
«Бұл мүліктің тағдырын сот анықтайды, не ол жәбірленушілерге келтірілген залалды өтеуге жұмсалады, не ол мемлекет кірісіне түседі», — деді ол.
Перизат Қайрат туралы не белгілі?
Перизат Қайрат Biz Birgemiz Qazaqstan қайырымдылық қорының төрайымы болды, Қазақстандағы белсенді еріктілер қозғалысының жетекшісі ретінде танымал. Ол су тасқынынан зардап шеккендерге көмек көрсету, Газа секторындағы гуманитарлық миссиялар және басқа да қайырымдылық шараларымен айналысып, қоғамда беделге ие болды.
2024 жылы 14 қарашада Қаржылық мониторинг агенттігі Перизат Қайрат 1,5 миллиардты жымқырды деген күдікке ілінгенін хабарлады.
Сонымен қатар, ол 2023 жылғы қарашада Палестина тұрғындарына гуманитарлық көмек көрсету үшін қаражат жинап, оның 200 миллионын қалтасына басқан деген күдікке ілінді. ҚМА дерегінше, 2023 жылғы желтоқсанда осы ақша есебінен Перизат Қайрат Sensata Plaza элиталық кешенінен 49 миллион теңгеге үш бөлмелі пәтер және 30 миллион теңгеге Mercedes-Benz EQE 500 4 Matic жаңа көлігін сатып алған.
2024 жылы 16 қарашада Астана қаласының тергеу соты Перизат Қайрат 2 айға қамауға алынғанын хабарлады.
2024 жылы 13 желтоқсанда Перизат Қайраттың элитикалық пәтерлері, қымбат көліктері бұғатталды. Сондай-ақ, Перизат Қайраттың тұрғылықты жерін тінту барысында қайырымдылыққа жиналған қаражатқа сатып алынған қымбат техника, Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada және т.б. сияқты танымал әлемдік бредтердің киімдері, аяқкиімі, зергерлік бұйымдары, сөмкелері тәркіленді.
