«Ақ самаурын» — Оралханның алғашқы кітабы. Өмірде өзі куә болған немесе куәгерлердің өз аузынан естіген қызықты мезеттерді қарапайым ғана тілмен баяндап, әр оқиғадан мағыналы ой түюге тырысатын жазушының қысқа әңгімелері тәлім мен тағылымға толы.
Кітап көпшілік оқырман қауымға арналады.
Әрине, бірнеше жылдан бері ақпарат саласында еңбек етіп, азды-көпті мақала жазып, оқырмандардан келген хаттарды қорытып жүргендіктен сөздің қадірін бір адамдай-ақ түсінетін сияқтымын. Дегенмен де осы жылдар ішінде газет жұмысынан бір сәт қол босаған кезде естіген-көрген қызық әңгімелерді, өз басымнан өткен күлкілі оқиғаларды, жанымды тебіренткен, терең ойға қалдырған дүниелерді ақ қағазға түсіре беріппін.
Кейде біреулер мені «Тым қарапайым жазасың» деп жазғырып жатады. Бәлкім, шынында солай шығар. Әйтеуір, ақ қағазға жазған жолдарымды қайта-қайта оқырманның көзімен оқып, «осы бір жерлерін түсінбей қалады-ау» деп, қайта-қайта түзеп, оқырманға ешқандай қиындық түсіргім келмейтіні бар. Жазған дүниеме көзі түскен жан бірден түсініп, астарлап айтайын деп тұрғанымды ә дегеннен байқаса екен деп ойлаймын. Сондықтан осыған дейін газет-журналдарда, әлеуметтік желілерде жарияланған бір топ дүниелерімді топтастырып, кітап етіп шығаруды жөн көрдім. Кем-кетігі боп жатса, кешірім сұраймын, құрметті оқырман!
Кітапты төмендегі сілтемеден жүктеп алсаңыз болады
