Белгілі пара спортшы, жерлесіміз Нышан Елубайұлы Өмірәлінің қазасына орай жақындарына қайғырып көңіл айтамын.
Нышан бауырымыз ер азаматқа тән өр мінез, батырлық пен батылдық, қайсарлық сынды қасиеттерімен ерекшеленді. Асқақ рухтың жарқын үлгісін көрсетті.
Байрақты бәсекелерде Әнұранымызды әуелетіп, көк Туымызды биікте желбіретті. Толағай табыстарға жетті.
Пара таеквондошы екі дүркін Әлем чемпионы, Азия чемпионы, сондай-ақ Азия ойындарының және түрлі халықаралық дүбірлі додалардың жүлдегері атанды. Паралимпиада ойындарында да бар күш-жігерін жұмсап, ел намысын абыройлы қорғай білді.
Осындай ардақты азаматтың қазасын зор күйзеліспен қабылдадым.
Марқұмның иманы саламат, жатқан жері жайлы, топырағы торқа болсын!
Артында қалған туған-туыстарына ұзақ ғұмыр тілеймін!
Жамбыл облысы әкімі Ербол Қарашөкеевтің телеграм арнасы
